कोरेगाव (जि. सातारा) : शहरातील पाणीपुरवठ्याच्या प्रश्नाने आता वेगळेच वळण घेतले आहे. गढूळ, मातीमिश्रित पाणीपुरवठा होत असल्याच्या कारणावरून नगराध्यक्षांच्या दालनात प्रतीकात्मक महाळ घालून नगरपंचायतीच्या कार्यपद्धतीचा निषेध करणाऱ्या आंदोलकांविरुद्ध नगराध्यक्षांनी पोलिस ठाण्यात फिर्याद दिली असून, याप्रकरणी आंदोलकांसह 13 जणांवर पोलिसांनी गुन्हा दाखल केला आहे. 

गढूळ, मातीमिश्रित पाणीपुरवठा होत असल्याबाबतचे निवेदन देण्यासाठी शहरातील नागरिकांसह सोनेरी ग्रुपचे काही सदस्य बुधवारी (ता. नऊ) नगरपंचायत कार्यालयात गेले होते. निवेदन स्वीकारण्यासाठी नगराध्यक्ष अथवा कोणीच सदस्य येत नसल्याचे दिसताच संतप्त झालेल्या नागरिकांनी नगराध्यक्षांच्या दालनात प्रतीकात्मक महाळ घालून नगरपंचायतीच्या कार्यपद्धतीचा निषेध केला. दरम्यान, मुख्याधिकारी विजया घाडगे यांनी निवेदन घेऊन आलेल्या नागरिकांशी चर्चा करून दोन दिवसांत पाणीपुरवठा सुरळीत करण्याची ग्वाही त्यांनी दिल्याचे आंदोलकांनी सांगितले होते. 

आरक्षण लागू होईपर्यंत मराठ्यांसाठी या १० योजना सुरु करा, उदयनराजेंची मागणी

या पार्श्वभूमीवर नगराध्यक्षा रेश्‍मा कोकरे यांनी आंदोलकांसह 13 जणांविरुद्ध पोलिस ठाण्यात फिर्याद दिली आहे. नगरपंचायत कार्यालयातील नगराध्यक्षांच्या दालनातील टेबलवर महाळ घालण्याचे आंदोलन करून या आंदोलनाची छायाचित्रे व्हॉट्‌सऍपवर प्रसिद्ध केली आणि नगराध्यक्षपदावरील कामकाजाबद्दल बदनामी केली, तसेच बेकायदा जमाव जमवून कोरोनाच्या पार्श्वभूमीवरील जिल्हाधिकाऱ्यांच्या आदेशाचे उल्लंघन केल्याचे फिर्यादीत नमूद केले आहे. याप्रकरणी सोनेरी ग्रुपचे अध्यक्ष संतोष नलावडे, राष्ट्रवादी युवक कॉंग्रेसचे तालुकाध्यक्ष अजित बर्गे, कोरेगाव युथ फाउंडेशनचे कार्याध्यक्ष अमर देशमुख, डेकोरेटर्स संघटनेचे सूरज पवार यांच्यासह 13 जणांवर गुन्हा दाखल झाला आहे. 

कोरोना काळात नगरसेवकांचे गलिच्छ राजकारण; ऑनलाइन सभेला 12 नगरसेवकांचा विरोध

आंदोलकांची जिल्हाधिकाऱ्यांकडे तक्रार 
शहरात गेले वर्षभर पाण्यासाठी संघर्ष सुरू असून, नागरिकांनी वेळोवेळी तक्रार करूनही नगरपंचायतीच्या कामकाजात सुधारणा झाली नाही. पाण्यासाठी निवेदन घेऊन आलेल्यांना सामोरे जाण्याऐवजी त्यांच्यावरच गुन्हे दाखल करणाऱ्या नगराध्यक्षांच्या विरोधात आम्ही जिल्हाधिकाऱ्यांकडे तक्रार नोंदवली असून, सोमवारी प्रत्यक्ष भेटून नगरपंचायतीतील कारभार व पती हस्तक्षेपाची माहिती जिल्हाधिकाऱ्यांना देणार असल्याचे सोनेरी ग्रुपचे अध्यक्ष संतोष नलावडे व अजित बर्गे यांनी सांगितले.

संपादन : बाळकृष्ण मधाळे