कऱ्हाड (जि. सातारा) : निवृत्त होणाऱ्या कर्मचाऱ्याचा वरिष्ठ अधिकारी शाल, श्रीफळ, मानचिन्ह देवून सत्कार केला जातो. मात्र, पालिकेतील निवृत्त झालेले शिपाई दत्तात्रय गजरे यांचा पालिकेचे मुख्याधिकारी रमाकांत डाके यांनी आगळावेगळा सत्कार केला. श्री. गजरे यांना श्री. डाके यांनी मुख्याधिकारी यांच्या खुर्चीत बसण्याचा मान दिला. त्याशिवाय दुपापर्यंतचा कारभारही करण्याची संधी दिली. त्यामुळे 30 वर्षांपासून पालिकेत शिपाई म्हणून आदेशाचे पालन करणारे गजरे नोकरीच्या शेवटच्या दिवशी साहेबी थाटात निवृत्त झाले. त्याचा आनंद त्यांच्या चेहऱ्यावर झळकत होता. 

पालिकेचे शिपाई गजरे बुधवारी (ता. ३०) सेवानिवृत्त झाले. तब्बल 30 वर्षांपासून ते पालिकेत अविरत सेवा करत आहेत. शिपाई म्हणून काम करताना त्यांनी चांगले काम केल्याने पालिकेतील त्यांना सन्मान होता. बुधवारचा गजरे यांच्या निवृत्तीचा पालिकेतील शेवटचा दिवस होता. त्यामुळे श्री. गजरे यांच्यासाठी आजचा दिवस अविस्मरणीय होता. पालिकेत उद्यापासून आपण असणार नाही, या विचारानेच ते दिवसभर वावरत होते. अनेकांच्या त्यांनी भेटी घेऊन आभार मानले. 

आली रे आली.. आता नागपूरच्या गुंडांची बारी आली!

मुख्याधिकारी डाके यांना भेटण्यासाठी ते आले. त्यावेळी गजरे यांना विलक्षण आनंद झाला. कारण, मुख्याधिकारी डाके यांनी श्री. गजरे यांचा वेगळ्याच थाटात केलेल्या सन्मानाने ते गहीवरून आले. ज्या खुर्चीत बसून पालिकेच्या मुख्याधिकारी यांनी गजरे यांना कामाचे आदेश देत होते. सलग 30 वर्षांपासून त्या आदेशाप्रमाणे गजरेही काम करत होते. त्याच खुर्चीत बसण्याचा मान मुख्याधिकारी डाके यांनी गजरे यांना दिला होता. त्यामुळे गजरे यांचा बुधवारी मुख्याधिकारी डाके यांनी केलेला सत्कार त्यांच्यासाठी सर्वांगसुंदर, अविस्मरणीय असाच ठरला. 

संपादन : बाळकृष्ण मधाळे