गोंदवले : वडिलांचा आयुर्वेदाचा वारसा जपण्याबरोबरच वनौषधी देवराई साकारण्यासाठी पुण्यातील वकिलांनी गोंदवल्यात पाहिले पाऊल उचलले आहे.श्री ब्रह्मचैतन्य महाराजांच्या जागेत फुलणारी ही पहिली देवराई जिल्ह्यासाठी आदर्श मॉडेल ठरणार आहे.

माण खटावच्या ग्रामीण भागात पस्तीस वर्षे आयुर्वेदाच्या माध्यमातून रुग्णसेवा करणाऱ्या डॉ पुंडलिक धायतडक यांनी विविध तेरा देशात आयुर्वेदाचा प्रचार व प्रसार करून जागतिक पातळीवर नावलौकिक मिळविला.त्यांचा आयुर्वेदाचा वारसा जपण्यासाठी पुणे येथील त्यांचे सुपुत्र ऍड जे पी धायतडक यांनी प्रयत्न सुरू केले आहेत.

या प्रयत्नांची  मुहूर्तमेढ गोंदवल्यात रोवून त्यांनी वनौषधी वनस्पतीची लागवड करण्यासाठी पाऊल उचलले आहे.येथील इंदिरानगर वसाहतीजवळील श्री ब्रह्मचैतन्य महाराज समाधी मंदिर समितीच्या जागेत सुमारे सत्तर प्रकारच्या वनौषधी वनस्पतींच्या २०० हुन अधिक रोपांची लागवड आज करण्यात आली.

यावेळी श्री धायतडक यांच्यासह गोंदवल्याचे सरपंच जयप्रकाश कट्टे,ऍड आर एस खाडे, ऍड अभयसिह देशमुख,बाळासाहेब खाडे,हभप नारायण महाराज गंबरे,मेजर हणमंत देवकुळे,गणपत खाडे,तुकाराम खाडे,पै.शहाजी खाडे,प्रवीण भोसले,

गोरख वसव,दत्तात्रय यादव,यांच्या हस्ते वृक्षारोपण करण्यात आले.यावेळी मंदिर समितीचे प्रतिनिधी व ग्रामस्थ उपस्थित होते.या वनौषधी वनस्पतींची लागवड करून संगोपणाचीही जबाबदारी श्री धायतडक यांनी उचलली आहे.समाधी मंदिर समितीकडूनही सर्व मदत केली जाणार आहे.

श्री धायतडक म्हणाले,जुन्या वनौषधी वनस्पतींचे रक्षण व संरक्षण व्हावे यासाठी प्रयत्न करत आहोत.या वनस्पतींचा उपयोग येथील भविकांसह ग्रामस्थांना नक्की होईल.म्हणून हो वनौषधी देवराई साकारण्यासाठी सर्वांनी प्रयत्न करावेत.

  जयप्रकाश कट्टे म्हणाले,आरोग्यासाठी मोलाची असणारी वनौषधी वनस्पतींची लागवड करण्यात आली असून त्यांची जोपासना करण्याची जबाबदारी ग्रामस्थांची आहे.या कामी सर्वांनी सहकार्य करावे.

  नारायण गंबरे म्हणाले,रुग्णसेवेसाठी आयुर्वेदात वनौषधी खूप मोलाची असून गोंदवल्यात साकार होणाऱ्या वनौषधी प्रकल्पाची इतरांनीही प्रेरणा घ्यावी.