सातारा : जिल्ह्यातून एक धक्कादायक बातमी समोर येत आहे. फलटणमधील पतसंस्था अपहार प्रकरणातील संशयित दिगंबर आगवणे (Digambar Agawane) यांनी लोणंद येथील पोलीस कोठडीत (Lonand Police Custody) आत्महत्या करण्याचा प्रयत्न केलाय. टॉवेलच्या साह्यानं गळफास घेऊन त्यांनी आत्महत्या करण्याचा प्रयत्न केला.

आगवणेंची प्रकृती चिंताजनक असल्यानं तातडीनं त्यांना पुण्याला हलविण्यात आलं आहे. याबाबत माहिती अशी, दिगंबर आगवणे हे सात दिवसांपासून फसवणुकीच्या गुन्ह्यात लोणंद पोलिसांच्या कोठडीत होते. आज, मंगळवारी पहाटे कोठडीत टॉवेलच्या साह्यानं गळफास घेण्याचा त्यांनी प्रयत्न केला.

ही घटना काही वेळानंतर निदर्शनास आली. आगवणे यांच्यावर लोणंद येथील खासगी रुग्णालयात उपचार सुरू असून पुढील उपचारासाठी पुण्याला हलविण्यात आल्याचं समजतंय.