सातारा : सातारा जिल्हा मध्यवर्ती सहकारी बॅंकेने सध्याच्या धकाधकीच्या आणि कोरोना संसर्गाच्या वातावरणात कर्मचारी सुरक्षा आणि त्यांच्या कुटुंबीयांच्या भविष्याच्यादृष्टीने बॅंकेच्या सर्व कर्मचाऱ्यांना जीवन विमा संरक्षण देण्याचा ऐतिहासिक निर्णय घेतल्याचे प्रतिपादन बॅंकेचे अध्यक्ष आमदार शिवेंद्रसिंहराजे भोसले यांनी केले. 

कर्मचारी आयुर्विमा संरक्षण योजनेचा प्रारंभ बॅंकेचे उपाध्यक्ष सुनील माने यांच्या हस्ते भारतीय आयुर्विमा महामंडळाच्या अधिकाऱ्यांना बॅंकेच्या सेवक कल्याण निधीमधून विमा प्रिमियम 83.83 लाख रुपयांचा धनादेश देऊन करण्यात आला. सध्या कोरोनाच्या काळात नोटा, इतर कागदपत्रांची देवाण-घेवाण, ग्राहकांशी संपर्कामुळे बॅंकेचे बरेच कर्मचारी कोरोनाबाधित होऊन त्यांची जोखीम वाढली आहे. त्यामुळे बॅंकेच्या संचालक मंडळाने कर्मचारी हिताचा हा निर्णय घेतल्याचे बॅंकेचे उपाध्यक्ष श्री. माने यांनी सांगितले. 

नवरात्रोत्सवात गरबा, दांडियाला बंदी : जिल्हाधिकारी शेखर सिंह

भारतीय आयुर्विमा महामंडळाच्या सातारा विभागाचे वरिष्ठ मंडल प्रबंधक ललितकुमार वर्मा म्हणाले, "सातारा जिल्हा बॅंकेने कर्मचारी हित डोळ्यासमोर ठेवून राबविलेल्या विमा योजना प्रशंसनीय असून, बॅंकेने भविष्याचा वेध घेत उचललेले हे अत्यंत महत्त्वाचे पाऊल सहकारी बॅंकिंग क्षेत्राला दिशादर्शक आहे. ''या पॉलिसी अंतर्गत कर्मचाऱ्यांना यापूर्वी असलेल्या विमा संरक्षणाव्यतिरिक्त अधिकचे दहा लाखांपर्यंत जीवन विमा संरक्षण प्राप्त होणार आहे. 

परतीचा तडाखा! सातारा जिल्ह्यात दीड हजार हेक्‍टर पिकांचे नुकसान

बॅंक कर्मचाऱ्याचा नैसर्गिक मृत्यू झाल्यास एकत्रित 33 लाख रुपयांपर्यंत आणि अपघाती मृत्यू झाल्यास एकत्रित 69 लाख रुपयांपर्यंत आर्थिक मदत वारसाला प्राप्त होणार आहे, अशी माहिती बॅंकेचे मुख्य कार्यकारी अधिकारी डॉ. राजेंद्र सरकाळे यांनी दिली. याप्रसंगी बॅंकेचे सरव्यवस्थापक राजीव गाढवे, राजेंद्र भिलारे, बिगरशेती कर्ज विभागाचे व्यवस्थापक वाय. जे. साळुंखे, उपव्यवस्थापक महेश शिंदे, एलआयसी पेन्शन व समूह विमा सातारा शाखेचे व्यवस्थापक संतोष गायकवाड, उपव्यवस्थापक प्रदीप शिंगटे, बॅंकेचे अधिकारी, सेवक उपस्थित होते. 

संपादन : बाळकृष्ण मधाळे