विंग (सातारा) :  मोकाट गाईंचा उपद्रव येथे चिंतेचा विषय बनला असून, उभ्या पिकांवर हल्ल्याचे सत्र अद्याप सुरूच आहे. गाईंच्या कळपाने येथील कुंभारमाळ परिसरात रब्बीतील संकरित ज्वारीवर नुकताच हल्ला चढवला. तब्बल चार एकरांतील कोवळे पीक त्यांनी फस्त केले. उत्पादक त्यामुळे हवालदिल आहेत.
 
येथील विठ्ठलाई डोंगर वाघदरा पायथा परिसरात वन्यप्राण्यांसह मोकाट गाईंकडून पिकांवरील हल्ल्याचे सत्र अद्याप सरूच आहे. रब्बीतील पिकांना त्यांनी लक्ष्य केले आहे. येथील कुंभारमाळ परिसरात संकरित ज्वारीवर त्यांनी डल्ला मारला. तब्बल चार एकरांतील कोवळे ज्वारीचे पीक भुईसपाट केले. ही घटना रात्री घडली. त्यामुळे सकाळी पीक दिसेनासे झाले आहे. एकाच भावकीतील राजाराम कुंभार, तानाजी कुंभार, अनिल कुंभार, नाना कुंभार, दिनेश कुंभार, हणमंत कुंभार, विश्वास कुंभार आदी शेतकऱ्यांचे त्यात मोठे नुकसान झाले आहे. गुडघ्यावर आलेले पीक कापून नेल्यासारखी स्थिती त्या ठिकाणी झाली आहे. अतिशय काबाडकष्ट करून पीक चांगल्या स्थितीत आणले होते. रातोरात पीक नष्ट झाल्याचे पाहून उत्पादकांची अवस्था आता केविलवाणी झाली आहे.

पंचायत समितीच्या सदस्यांना मिळणार दहा लाखांचा विकासनिधी

तत्पूर्वी त्याच परिसरात सुनील पाटील व बाबूराव खबाले यांच्या शेती पिकाचे नुकसान त्यांनी केले आहे. लहान-मोठ्या शंभरवर गाईंचा कळप आहे. विशेषतः विठ्ठलाई डोंगर पायथा परिसरातील उभ्या पिकावर हल्ला त्या करतात. रातोरात पीक गायब करतात. एकेका रात्रीला एकर-दोन एकरांतील पीक नष्ट करतात. एका परिसरातून दुसऱ्या परिसरात ठरलेला नित्यक्रम त्याचा असतो. शेतकऱ्यांची डोकेदुखी त्यामुळे वाढली आहे. काही शेतकऱ्यांनी पिकांच्या रक्षणासाठी शेताभोवती तारकुंपणे घातली आहेत. ठिकठिकाणी राखणीसाठी माळे उभारले आहेत. तरीही शेतात घुसून त्या नुकसान करत आहेत. रानटी डुकरानंतर आता मोकाट गाईंकडून पिकांवरील हल्ल्यामुळे त्या परिसरातील शेतकरी अक्षरश: वैतागले आहेत.

साताऱ्याच्या परीक्षकांकडून कराड जनता बॅंकेचे लेखापरीक्षण; आयुक्तांकडून आदेश

Edited By : Siddharth Latkar