ढेबेवाडी, (जि.सातारा) : ‘बारक्या शेंबड्या पोरालाही आता पन्नास खोके- एकदम ओके कळायला लागले आहे. तुमच्या येथे तर सायरन वाजू लागला की लोकं म्हणतात ते बघा पन्नास खोकेवाला चाललाय, बैलपोळ्याला बैलाच्या अंगावरही ‘पन्नास खोके- एकदम ओके’ लिहले जातेयं. हे आम्ही सांगितले नव्हते, लोकांपर्यंतच ते पोचलेय’, असा टोला विधानसभेचे विरोधी पक्षनेते अजित पवार यांनी आज लगावला.

पाटण मतदारसंघातील राष्ट्रवादी काँग्रेसच्या कार्यकर्त्यांचा मेळावा आज गुढे फाटा (ता.पाटण) येथील श्री गणेश मंगल कार्यालयात झाला. मेळाव्यात अजित पवार यांनी पालकमंत्री शंभूराज देसाई यांचे नाव न घेता भाषणात अप्रत्यक्षपणे अनेक टोले लगावले.

ते म्हणाले, ‘‘हिंदूहदयसम्राट बाळासाहेब ठाकरे यांनी मराठी माणसाला न्याय व आधार देण्यासाठी शिवसेना उभी केली,वाढविली. साधे कार्यकर्ते मोठे केले. मात्र जे त्यांच्या जिवावर मोठे झाले, त्यांनीच त्यांच्या मुलाकडील शिवसेना काढून घेतली, असा काय चमत्कार तिथे झाला की आमदार, खासदारांना जावे लागले. अशी गद्दारी फार काळ चालत नाही.

कर्नाटकात जे गेले त्यांना जनतेने पराभूत केले आहे. आगामी निवडणुकीत महाविकास आघाडीत ज्या पद्धतीने जागा वाटप होईल त्या पद्धतीने तुम्हाला इमाने इतबारे काम करावेच लागेल, ’’ अशी सूचनाही त्यांनी कार्यकर्त्यांना केली.