कऱ्हाड : शिवसेना (Shiv Sena) ही फुटलेली नाही. मूळ शिवसेना ही आमची आहे. केंद्रीय निवडणूक आयोगाने शिवसेना हे आम्हाला नाव दिले आहे. शिवसेनेचे धनुष्यबाण चिन्ह हे आम्हाला दिले आहे. त्यामुळे शिवसेना फुटली असे कोणी म्हणू शकत नाही. शिवसेना प्रमुखांच्या ज्वलंत विचाराशी प्रतारणा कोणी केलेली आहे, याचे आत्मपरीक्षण आमच्यावर टीका करणाऱ्यांनी करावे, असा पलटवार पालकमंत्री शंभूराज देसाई (Shambhuraj Desai) यांनी शिवसेना प्रमुख उद्धव ठाकरे यांच्यावर केला.

शिवसेना फोडणाऱ्या वालीचा मी वध करणार असे वक्तव्य शिवसेनाप्रमुख ठाकरे यांनी केले. त्यावर प्रतिक्रिया देताना मंत्री देसाई बोलत होते. ते म्हणाले, ‘‘नियमाने कायद्याने, घटनेने ज्यांना निर्णय घेण्याचा अधिकार आहे. त्या केंद्रीय निवडणूक आयोगाने शिवसेना ही आम्हाला दिलेली आहे. उद्धव बाळासाहेब ठाकरे (Uddhav Thackeray) गटाची मंडळी त्याच्यावर न्यायालयात गेली. न्यायालयानेही त्यांचे ऐकले नाही. राज्य न्यायाने, घटनेने चालते.

आम्ही कायद्याच्या चौकटीत राहून योग्य निर्णय घेतलेले आहेत. त्यामुळे ज्यांनी वंदनीय बाळासाहेब ठाकरे यांच्या विचारापासून अडीच वर्षे मुख्यमंत्री पदासाठी, सत्तेसाठी बाजूला गेले. शिवसेनाप्रमुख बाळासाहेब ठाकरे यांनी काँग्रेसला बरोबर घेणार नाही. माझ्या पक्षाची मी काँग्रेस होऊ देणार नाही, असे सांगितले होते. त्याच्या बरोबर उलटी कृती ठाकरे गटाने केली.’’

सत्तेसाठी ज्यांच्या विरुद्ध लढले त्यांच्याबरोबर जाऊन ते सत्तेत बसले. त्यामुळे शिवसेना प्रमुखांच्या ज्वलंत विचाराशी प्रतारणा कोणी केलेली आहे याचे आत्मपरीक्षण आमच्यावर टीका करणाऱ्यांनी करावे असे त्यांनी सांगितले.