दहिवडी  (जि. सातारा) : माणच्या बहुतांशी भागात काही दिवसांपासून पावसाने दमदार हजेरी लावली होती. बुधवारी दुपारपासून पुन्हा जोरदार पावसाने माणला झोडपून काढले. या पावसाने शेतीला फायदा होण्यापेक्षा नुकसानच होण्याची शक्‍यता आहे. आंधळी धरणाच्या पाणीपातळीत झपाट्याने वाढ होऊ लागली आहे. 

यंदाच्या वर्षी पावसाळ्याच्या सुरुवातीला माणमध्ये दमदार पाऊस झाला नाही. मात्र, रिमझिम पाऊस सतत पडत होता. त्यामुळे वाटाण्याचे नुकसान झाले. मात्र, बाजरीसारखी पिके जोमदार आली. काही दिवसांपासून मात्र जोरदार पावसाने माणमध्ये हजेरी लावली. या पावसाने ओढे, नाले तर भरभरून वाहिलेच, तसेच माणगंगा नदीलाही पूर आला. बहुतांशी सिमेंट बंधारे, माती नालाबांध व तलाव भरून गेले. ही स्थिती सुखावह असली, तरी सतत पडत असलेल्या पावसाने शेतांमध्ये पाणी साठले आहे. शेतात राहिलेले मूग कुजले आहेत. 

आंदोलन भोवले! पश्चिम महाराष्ट्रातील तेवीस कलाकारांवर गुन्हा

बाजरी आडवी पडली असून, कणसे काळी पडण्याची भीती आहे. कांद्याचे मोठे नुकसान होण्याची शक्‍यता आहे. कांद्याची रोपे सडू लागली आहेत. पेरलेले कांदा बी उगवून येण्याची शक्‍यता दुरावत चालली आहे. उगवलेले नासण्याची शक्‍यता आहे. आजच्या तुफानी पावसाने पुन्हा एकदा बहुतांशी माणला झोडपून काढले. दहिवडी शहरासह परिसरात मुसळधार पाऊस झाला. नरवणे परिसरातही या पावसाने जोरदार हजेरी लावली. पश्‍चिम माणला या पावसाने चांगलाच तडाखा दिला. त्यामुळे माणगंगा नदीसह ओढ्या-नाल्यांना मोठा पूर आला. अनेक ठिकाणी शेतांमध्ये मोठ्या प्रमाणात पाणी साठले आहे. 

संपादन : बाळकृष्ण मधाळे