ढेबेवाडी (सातारा) : परिसरात आज सलग दुसऱ्याही दिवशी विजांच्या कडकडाटासह झालेल्या वादळी पावसाने (Heavy Rain) ठिकठिकाणी नुकसानीच्या घटना घडल्या. काही ठिकाणी घरांची छप्परे उडाली, विजेचे खांब कोलमडले, झाडे मोडून पडली असून, पावसामुळे नदी, ओढे दुथडी भरून वाहत आहेत. (Heavy Rain In Dhebewadi Area Satara News)

आज सायंकाळी विजांच्या कडकडाटात जोरदार पावसाला सुरुवात झाली. तासभर पावसाचा जोर टिकून होता. पाचुपतेवाडी जवळच्या जाधववाडीतील सुरेश जाधव यांच्या घरावरील छप्पर वादळाने उडाल्याने आतील प्रापंचिक साहित्य व धान्य भिजून नुकसान झाले. पत्रा अंगावर पडल्याने श्री. जाधव यांना किरकोळ दुखापत झाल्याचे सरपंच आत्माराम पाचुपते यांनी सांगितले.

मी कोणाच्या आव्हानाला भीक घालत नाही, मीही 96 कुळी मराठाच : शशिकांत शिंदे

ते म्हणाले, "तेथील मंदिरावरीलही छप्पर उडाले असून, विजेचे खांब कोलमडून तर झाडे मोडून पडली आहेत. पावसामुळे वांग नदीसह ओढे, नाली भरून वाहत आहेत. पवारवाडी जवळच्या नदीवर पुलाचे बांधकाम सुरू असल्याने नदीतून तयार केलेला पर्यायी मार्ग पाण्याखाली गेल्याने निवी, कसनीसह अनेक दुर्गम गावे व वाड्यावस्त्यांचा दळणवळण संपर्क विस्कळित झाला होता. पावसाने खंडित झालेला परिसरातील वीजपुरवठा रात्री उशिरापर्यंत सुरळीत झालेला नव्हता.

Heavy Rain In Dhebewadi Area Satara News