दहिवडी (जि. सातारा) : माणमधील सर्वच तलाव भरून वाहत असताना आंधळी धरणही सोमवारी सायंकाळी झालेल्या मुसळधार पावसानंतर रात्रीच्या सुमारास धरणाच्या सांडव्यावरून पाणी ओसंडून वाहू लागले. त्यामुळे माणवासीयांच्या आनंदाला उधाण आले. तालुक्‍याची जीवनवाहिनी म्हणून माणगंगा नदीकडे पाहिले जाते. या वर्षी पावसाळ्याच्या सुरवातीस म्हसवड परिसरात माणगंगा वाहू लागली होती. सप्टेंबर महिन्यात उगमाच्या ठिकाणी नदी वाहण्यास सुरुवात झाली. बहुतांशी पाणीसाठे भरून वाहत होते. मात्र, आंधळी धरण न भरल्याने धरणापासून खाली गोंदवलेपर्यंत माणगंगा नदी वाहत नव्हती. त्यामुळे आंधळी धरण कधी भरते, याकडे माणवासीयांचे लक्ष लागून राहिले होते. 

सोमवारी सायंकाळी मुसळधार पाऊस झाल्याने नदी, नाले, ओढे यांना मोठा पूर आला. रात्रीच्या सुमारास धरण पूर्णक्षमतेने भरून पाणी सांडव्यावरून ओसंडून वाहू लागले. हे पाणी पुढे बिदाल, दहिवडीच्या दिशेने झेपावले. त्यामुळे नदीकाठच्या तसेच लाभक्षेत्रातील शेतकऱ्यांत समाधानाचे वातावरण पसरले. विशेषतः बिदाल व दहिवडीकरांसाठी आंधळी धरण भरणे महत्त्वाचे असते. दोन्ही गावांसाठीच्या पिण्याच्या पाणी योजना या धरणाच्या पाण्यावरच अवलंबून आहेत. धरणातून शेतीसाठी साधारण पाच ते दहा किलोमीटर पाइपलाइन नेण्यात आल्या आहेत. 

कोयना शतकाच्या उंबरठ्यावर; धरण क्षेत्रात मुसळधार!

धरण भरल्यामुळे शेतकरी, ग्रामस्थ यांच्यासोबत प्रशासनाने सुटकेचा नि:श्वास सोडला. सांडव्यावरून पाणी वाहू लागल्यानंतर खालील भागात माणगंगेला पूर आला. बिदाल, दहिवडी येथील नदीवरील काही पूल पाण्याखाली गेले. पाणी पाहण्यासाठी ग्रामस्थांनी धरणाकडे तसेच नदीकडे धाव घेतली. गेल्या वर्षी 21 ऑक्‍टोबर रोजी दहा वर्षांनंतर आंधळी धरण भरले होते. या वर्षी मुसळधार पावसामुळे बरोबर एक महिना अगोदरच म्हणजे 20 सप्टेंबर रोजी धरण भरल्यामुळे माणवासीयांच्या आनंदाला उधाण आले. लाभधारक शेतकऱ्यांत समाधान पसरले आहे.

संपादन : बाळकृष्ण मधाळे