कुकुडवाड (जि. सातारा) : वरकुटे-मलवडी परिसरात गेल्या पंधरवड्यात ढगफुटीसदृश परतीचा पाऊस होऊन ओढ्याला आलेल्या पुराने पोळवस्ती बंधाऱ्यासमोरच्या पुलावरून खरातवाडीसह फडतरेवस्ती, इनामदारवस्तीकडे जाणारा मुख्य रस्ताच वाहून गेला असून, परिसरातील शेतीतील पिकांचेही मोठ्या प्रमाणात नुकसान झाले आहे. त्यामुळे खरातवाडी, पोळवस्ती, फडतरेवस्ती, इनामदारवस्तीवर राहणाऱ्या नागरिकांचा गावाकडे ये-जा करण्याचा संपर्क तुटला आहे. 

वरकुटे-मलवडी परिसरात धुवाधार झालेल्या पावसाने बाजरी, ऊस, मका या पिकांसह तरकारी भाजीपाल्यांचे मोठ्या प्रमाणात नुकसान झाले आहे. ओढ्याकाठच्या परिसरातील शेतीचे बांधाखालील माती मोठ्या प्रमाणात वाहून गेल्याने त्याजागची जमीन खचली आहे. वरकुटे-मलवडी ते खरातवाडी रस्त्यावरील ओढ्याला मोठ्या प्रमाणात आलेल्या पुरात पोळवस्ती जवळचा पूल वाहून गेला आहे. ग्रामपंचायत अंतर्गत असणाऱ्या या पुलाचे कच्चे बांधकाम गेल्या वर्षांपूर्वीच करण्यात आले होते. 

सातारा : शेतक-यांच्या डाेळ्यांत पाणी : भात, साेयाबीनचे नुकसान

कृषी विभागाच्या वतीने या ओढ्यावर बांधण्यात आलेल्या साखळी बंधाऱ्यातील पाणी पुलाच्या वरपर्यंत साठून राहत होते. त्यातच मोठ्या प्रमाणात आलेल्या पुराच्या पाण्याने हा पूल वाहून गेल्याने खरातवाडी परिसरात वास्तव्यास असणाऱ्या नागरिकांची गैरसोय झाली आहे. संबंधित वाड्या-वस्त्यांवरील लोकांना गावात येण्यासाठी लांबून वळसा मारून गावात यावे लागत आहे. यामुळे वेळ, श्रम व इंधनावरील खर्च वाढत असल्याने स्थानिक रहिवाशांना या नाहक त्रासास सामोरे जावे लागत आहे. या ठिकाणी असणारा पूल हा कच्चा न करता सिमेंटमध्ये पक्का करण्यात यावा, अशी मागणी ग्रामस्थांसह बाबाराजे हुलगे यांनी केली आहे.

संपादन : बाळकृष्ण मधाळे