पाटण (जि. सातारा) : परदेशी महिलेने निसरे (ता. पाटण) येथून जीप चोरून नेली. जीप भरधाव चालवत असताना जीपचा विजयनगर येथे दुभाजकाला धडकून काल अपघात केला होता. त्या महिलेवर मल्हारपेठ दूरक्षेत्रात जीप चोरीचा गुन्हा नोंद झाला आहे. त्या महिलेला पाटण पोलिसांनी ताब्यात घेतले आहे. पॉली जेस्सी असे संबंधित महिलेचे नाव आहे. ती नेदरलॅंड येथील रहिवाशी आहे. 

पोलिसांकडून मिळालेली माहिती अशी, नावडी येथील ज्ञानदेव कृष्णत नलवडे यांचे किराणा मालाचे दुकान आहे. मल्हारपेठ येथे दुकानाचे साहित्य खरेदी करून जीपमध्ये ठेवले व घरी निघाले होते. वाटेत निसरे फाटा येथे जीप (एमएच 13 एन 549) कऱ्हाड-चिपळूण महामार्गावर उभी करून एका दुकानात खरेदीसाठी गेले. जीपची चावी जीपलाच राहिली होती. त्याचदरम्यान पॉली कोरनेलिया जेस्सी (वय 24, मुळ रा. क्रोनिजब्रिजे, नेदरलॅंड) ही परदेशी महिला त्याठिकाणी आली होती. जीपला चावी पाहिल्यानंतर त्या परदेशी महिलेने जीप चालू केली व कऱ्हाडकडे भरधाव वेगाने निघाली. परिसरातील काही जणांच्या ही बाब लक्षात आल्यानंतर पोलिस गस्तसाठी आलेल्या होमगार्डना झालेली घटना सांगितली. होमगार्डनी मोटारसायकलवरून जीपचा पाठलाग केला. मात्र, विजयनगर येथे भरधाव वेगात असणाऱ्या जीपने एका कारला धक्का दिला व रस्ता दुभाजकाला जाऊन धडकली आणि जीप पलटी झाली. मल्हारपेठ दूरक्षेत्रात ज्ञानदेव नलवडे यांनी गाडी चोरीची फिर्याद दिली आहे. कऱ्हाड पोलिसांकडून परदेशी महिलेला पाटण पोलिसांनी ताब्यात घेतले आहे. महिला निसरे फाटा येथे कुठून आली, याबाबत दिवसभर उलटसुलट चर्चा सुरू होती. पोलिस उपनिरीक्षक अजित पाटील तपास करीत आहेत. 

चोरलेल्या जीपमधून नेदरलॅंडच्या पॉली जेस्सीचा थरार; निसरे फाट्यावर एकाला धडक, कारलाही ठोकरले

अपघाताबद्दल कोठडी 

कऱ्हाड : निसरे फाट्यावरून जीप घेऊन पळून आलेल्या नेदरलॅंड येथील महिलेवर विजयनगर येथे अपघात केल्याबद्दल शहर पोलिसात गुन्हा नोंद झाला. तिला पोलिसांनी सकाळी ताब्यात घेऊन न्यायालयात हजर केले. त्यावेळी तिला न्यायालयीन कोठडी देण्यात आली. त्यावेळी तिला जामीन मंजूर झाला. मात्र, तिला पाटण पोलिसांच्या ताब्यात देण्यात आले. मल्हारपेठ येथे तिच्यावर वाहन चोरीचा गुन्हा दाखल झाला आहे. 

संपादन : बाळकृष्ण मधाळे