कऱ्हाड : रस्त्या कडेला उभा असलेल्या चौघांना पोलिसांच्या व्हॅन उडवल्याने एकजण ठार तर तिघे जखमी झाले आहेत. कऱ्हाड ते ढेबेवाडी रस्त्यवर कुसूर (ता. कऱ्हाड) येथे काल रात्री साडेअकराच्या सुमारास घटना घडली. सुजल उत्तम कांबळे (वय 17 वर्ष, रा. कोळेवाडी, ता. कराड) असे ठार झालेल्याचे नाव आहे. अन्य तिघे गंभीर जखमी आहेत. ढेबेवाडी पोलिस ठाण्याचे चालक हवालदार शंकर खेतमर यांच्यावर तालुका पोलिस ठाण्यात गुन्हा दाखल आहे.

कऱ्हाड-ढेबेवाडी रस्यावर कसूरच्या हद्दीत ढेबेवाडी पोलीस ठाण्याच्या भरधाव गाडीने रस्त्याकडेला उभ्या असणाऱ्या चौघांना उडवले. त्यातील एक जागीच ठार, अन्य जखमी आहेत. अन्य दोघे जण या अपघातातून बालबाल बचावले. घटनेनंतर कुसूर येथील तरूणांनी घटनास्थळी धाव घेऊन मदत केली. अपघाताची माहिती मिळताच तालुका पोलीसही घटनास्थळी दाखल झाले.

पोलीस व घटनास्थळावरून मिळालेली माहिती अशी की, ऊसतोडीचा हंगाम सुरू झाल्याने ऊसतोड मजुरांची टोळी कुसूरमध्ये आणण्यात आली होती. रात्री साडे अकराच्या सुमारास एका वाहनातून टोळी उतरत होती. त्यावेळी कोळेवाडीतील चौघे युवक रस्त्याकडेला उभे होते. त्यावेळी कोळेवाडी कडून ढेबेवाडीकडे निघालेल्या पोलीस व्हॅनने रस्त्याकडेला उभ्या असलेल्या चार तरूणांना उडवले.