सातारा शहरालगत आज सकाळी कृषी उत्पन्न बाजार समितीच्या नव्या इमारतीचे (Krushi Utpanna Bazar Samiti) भूमिपूजन होणार होते. यासाठी उभारलेल्‍या मंडपाचे खासदार उदयनराजे भोसले (Udayanraje Bhosale) समर्थकांनी मोडतोड करत कार्यक्रम उधळून लावण्याचा प्रयत्न केला.

या घटनेनंतर साताऱ्यात तणावाचे वातावरण निर्माण झाले आहे. घटनास्थळी पोलिसांचा फौजफाटा तैनात करण्यात आला आहे. दरम्यान, आमदार शिवेंद्रराजे भोसले (Shivendraraj Bhosale) यांनीही तिथं जाऊन तळ ठोकला आहे.

खासदार उदयनराजेंनी न्यायालयाचा अवमान केला जाऊ नये, अशी भूमिका पोलिसांसमोर मांडत सातारा कृषी उत्पन्न बाजार समितीच्या नूतन इमारतीच्या भूमिपूजनाचा कार्यक्रम थांबवावा, असं म्हटलं होतं. दरम्यान, उदयनराजे आणि पोलिसांच्या उपस्थित कार्यक्रमस्थळी आमदार शिवेंद्रराजे भोसले यांनी नारळ फोडत नूतन इमारतीच्या भूमिपूजनाचा सोहळा पार पाडला.

यावेळी शिवेंद्रराजेंनी जे कायदेशीर असेल ते करावं, असं पोलिसांना सांगितलं. आमदार शिवेंद्रराजे भोसले यांची सातारा कृषी उत्पन्न बाजार समितीत एकहाती सत्ता आहे. सध्या ही इमारत सातारा एसटी परिसरात आहे. नव्या इमारतीसाठी शहरालगत खिंडवाडी इथं जागा निश्चित करण्यात आली आहे. त्यासाठी भूमिपूजनचा कार्यक्रम शिवेंद्रराजे यांच्या उपस्थित होणार होता. मात्र, उदयनराजेंच्या समर्थकांनी इथं राडा घातला. त्यामुळं काही काळ इथं गोंधळ निर्माण झाला होता.