सातारा : स्वच्छ भारत अभियानांतर्गत सातारा जिल्ह्याने नावलौकिक मिळवला असला तरी शहराच्या जवळपासच्या उपनगरात, तसेच रस्त्यांवर कच-याचे साम्राज्य पसरल्याचे चित्र आहे. सातारा शहरातील सुज्ञ नागरिकांकडून बोगद्याच्या पलीकडे सातारा ते सज्जनगड रस्त्यावर नेहमीच कचरा टाकला जातो. ब-याच वेळा हा सर्व प्रकारचा कचरा येथे टाकल्यानंतर परिसरात व रस्त्यावरही पसरला जातो. यामुळे येथून प्रवास करताना येथील घाणीमुळे नाकीनऊ येते. या कच-याच्या दुर्गंधीमुळे आरोग्यवरही परिणाम होत असून नागरिकांचे आरोग्य धोक्यात आले आहे.  

सातारा बोगद्यामार्गे पुढे सज्जनगड व ठोसेघर येथे अनेक पर्यटक ये-जा करत असतात. मात्र, बोगद्याच्या पलीकडे गेल्यावर याच पर्यटकांना विनाकारण घाणीचा सामना करावा लागत आहे. प्रशासनाने याकडे वेळीच लक्ष न दिल्यास येथे शहरातील सर्वांत मोठी कचराकुंडी होण्यास वेळ लागणार नाही. याच कचराकुंडीत सध्या मोठ्या प्रमाणात घाणीचे साम्राज्य पाहावयास मिळत आहे. त्यामुळे येथे मोकाट कुत्र्यांची संख्याही भरपूर आहे.  

निधीअभावी साता-यात तब्बल 600 कोटींचे विकासकाम ठप्प

सायंकाळच्यावेळी ही भटकी कुत्री काही दुचाकींच्या अपघातासही कारणीभूत ठरली आहेत. त्यामुळे विनाकारण दुचाकीवाल्यांच्यात वादावादीही पाहावयास मिळत आहे. त्यामुळे कचरा टाकणा-यांनीही विचार करायला हवा. उघड्यावर कचरा टाकणा-यांवर योग्य ती कारवाई केली पाहिजे, असे येथून प्रवास करणा-या गावांतील ग्रामस्थांना वाटत आहे. शहरातील सुशिक्षित नागरिकांनीच जर असा रस्त्यावर कचरा टाकला तर कसे होणार, असा प्रश्नच उपस्थित होताना दिसत आहे. गेल्या काही दिवसांपासून या मार्गावर दुर्गंधी पहायला मिळत असून नागरिकांचे आरोग्य धोक्यात आले आहे. यावरती वेळीच तोडगा काढणे अपेक्षित आहे, अन्यथा मोठा अनर्थ होण्याची शक्यता नाकारता येत नाही.