गोंदवले ( सातारा) : अनलॉकनंतर कोरोनाने पुन्हा डोकेवर काढले आहे. जिल्ह्यात रुग्णसंख्या दोन अंकीवरून पुन्हा चार अंकी झाली आहे. गेल्या १० दिवसांतील सातारा तालुक्यात कोरोनाबाधितांची संख्या सर्वाधिक तर महाबळेश्वर तालुक्यात सर्वांत कमी आहे. लोकसंख्येच्या तुलनेत मात्र, माण तालुक्यात जास्त कोरोनाबाधित आढळून आले आहेत. सर्वांनीच वेळीच काळजी न घेतल्यास ही संख्या झपाट्याने वाढण्याची भीती व्यक्त होत आहे.
हे ही वाचा : साता-यात 179 नागरिकांना डिस्चार्ज ; 409 जणांचे नमुने तपासणीला
गेल्या आठ महिन्यानंतर कोरोना आवाक्यात आल्याने शासनाने टप्प्याटप्प्याने सर्वत्र अनलॉक केले. अद्याप संपूर्ण अनलॉक करण्यात आले नसले तरी लोक मात्र, आता बिनघोरपणे फिरताना दिसत आहेत. शासनाने बंधने घालूनही विनामास्क फिरणाऱ्यांची संख्या मोठी आहे. सामाजिक अंतराच्या नियमांचेही तीन तेरा वाजल्याचे पाहायला मिळत आहे. आरोग्य व पोलिस यंत्रणा कार्यरत असूनही सध्या बहुतांशी लोक निष्काळजीपणे वागत असल्याचे चित्र आहे. याशिवाय वातावरणात वारंवार होत असलेल्या बदलामुळे सर्दी, खोकला व तापाच्या रुग्णांमध्ये वाढ होत आहे. परिणामी आता पुन्हा कोरोनाचा फैलाव झपाट्याने वाढत असल्याचे दिसत आहे.
नोव्हेंबर महिन्यातील शेवटच्या १० दिवसांच्या आकडेवारीवरून जिल्ह्यात तब्बल 1768 कोरोनाबाधित नव्याने आढळून आले आहेत. यामध्ये सातारा तालुक्यात सर्वाधिक 358 तर त्यापाठोपाठ फलटण तालुक्यात 337 तर माणमध्ये 213 कोरोनाबाधित आढळले आहेत. सर्वांत कमी कोरोनाबाधित महाबळेश्वर तालुक्यात आहेत. जनगणना 2011 नुसार सातारा तालुक्याची लोकसंख्या पाच लाख 20 हजार 49 व फलटण तालुक्याची लोकसंख्या तीन लाख 42 हजार 667 आहे.
माणची लोकसंख्या दोन लाख 25 हजार 634 आहे. लोकसंख्येचा विचार करता माणमध्ये मात्र कोरोनाबधितांची संख्या अधिक आहे. त्यामुळे सध्यातरी जिल्ह्यात माण तालुक्यात रुग्णवाढीचा वेग अधिक असल्याचे दिसत आहे. आगामी काही दिवसांत कोरोनाबाधितांची संख्या आणखी वाढण्याची भीती व्यक्त होत आहे. त्यामुळे सर्वांनीच नियमांचे काटेकोर पालन करून काळजी घेण्याची आवश्यकता आहे.
अशी आहे स्थिती
20 ते 30 नोव्हेंबर या काळात तालुकानिहाय आढळलेल्या कोरोनाबाधितांची संख्या :
सातारा-358, जावळी-62, कऱ्हाड- 139, माण-213, खटाव-171, कोरेगाव-151, फलटण-337, वाई-75, महाबळेश्वर-33, खंडाळा-142, पाटण-47, इतर-40.
संशयित रुग्ण तपासणी वाढविण्यात आली असल्याने कोरोनाबाधित रुग्ण मोठ्या प्रमाणात निदर्शनास येत आहेत. लोकांनी कोणताही आजार न लपविता तत्काळ आरोग्य विभागाशी संपर्क साधावा. तसेच नियमांचे काटेकोरपणे पालन करून सर्वांनी काळजी घ्यावी.
-डॉ. लक्ष्मण कोडलकर, तालुका वैद्यकीय अधिकारी, माण
संपादन - सुस्मिता वडतिले
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.