सातारा : आंतरजातीय विवाह केला म्हणून बहि‍ष्कार टाकलेल्या मेढा (ता. जावळी) येथील शशिकांत देशमुख कुटुंबीयावरील बहिष्कार मागे घेण्याचा निर्णय महाराष्ट्र अंधश्रद्धा निर्मूलन समितीच्या (Maharashtra Andhashraddha Nirmulan committee) मध्यस्थीने नुकताच घेण्यात आला आहे. याबाबत माहिती अशी, शशिकांत देशमुख (मेढा, ता. जावळी) यांची मुलगी रोमाली हिचा विवाह तिच्या पसंतीनुसार व सर्व समाजाला सांगून विवाहाला (Marriage) निमंत्रित करून केला होता. तो आंतरजातीय होता. मात्र, त्यांच्याच नंदिवाले समाजातील जातपंचांनी देशमुख कुटुंबीयांना बहिष्कृत केले.

या बहिष्कार प्रकरणात पोलादपूर (जि. रायगड), नागेवाडी, सातारा, मेढा (जि. सातारा) व रत्नागिरी अशा तीन जिल्ह्यांतील जात पंच यामध्ये सहभागी झाले होते. याप्रश्‍नी अंधश्रद्धा निर्मूलन समितीकडे जुलैमध्ये लेखी तक्रार आली होती. याची दखल घेऊन पोलिस अधीक्षक अजयकुमार बन्सल यांची अंनिस शिष्टमंडळाने प्रत्यक्ष भेट घेऊन सामाजिक बहिष्कार घटनेबाबत चर्चा केली. त्यांनी संबंधित पंच व तक्रारदार यांना बोलवून चर्चा करावी व प्रकरण मिटवण्याचा प्रयत्न करावा अन्यथा रीतसर सामाजिक बहिष्कार कायद्याच्या कलमान्वये कायदेशीर कारवाई करावी, असे आदेश दिले. या अनुषंगाने मेढ्याचे सहायक पोलिस निरीक्षक अमोल माने व अंनिस आणि संबंधित सर्व पंच, तसेच तक्रारदारांच्या समक्ष बैठक झाली.

बैठकीत सर्व बाजूंनी चर्चा करून जात पंचायतीद्वारे अन्यायकारक निर्णय यापुढे घेतले जाणार नाहीत. देशमुख कुटुंबातील सर्वांना यापुढे सामावून घेऊन कार्यक्रम घेतले जातील. याही पुढे जाऊन सर्वच जात पंच यांना एकत्रित करून जातपंचायत बरखास्त करून एक आदर्श निर्माण करू, असे आश्वासन सर्वच उपस्थित पंचांनी दिले. समाजातील आंतरजातीय लग्न केलेल्या व बहिष्कृत केलेल्या सर्व जोडप्यांना व इतर लोकांना एकत्रित बोलावून परत समाजात घेण्याचा निर्णय बैठकीत घेण्यात आला. या वेळी अंनिसचे राज्य कार्यकारी समिती सदस्य डॉ. हमीद दाभोलकर, प्रशांत पोतदार, जात निर्मूलनचे राज्य सदस्य शंकर कणसे, बुवाबाजी संघर्ष राज्य सदस्य भगवान रणदिवे, जिल्हा कार्याध्यक्ष वंदना माने, शाखा कार्याध्यक्ष डॉ. दीपक माने, जावळीचे कार्यकर्ते प्रतापराव सकपाळ, श्री. कांबळे, ॲड. दयानंद माने उपस्थित होते.