सातारा : पालिकेची सर्वसाधारण सभा लाॅकडाऊन सुरु झाल्यापासून झाली नाही. शासनाच्या निर्देशानुसार व्हीसीवर स्थायी सभा घेण्याचा प्रयोग केला होता. मात्र, तांत्रिक अडचणीमुळे तो यशस्वी होवू शकला नाही, त्यामुळे पालिकेची सर्वसाधारण सभा ही प्रत्यक्ष उपस्थितीत सोशल डिस्टन्स ठेवून घेण्यासाठी मार्गदर्शन मिळावे, अशी मागणी नगरविकास विभागाकडे पत्राव्दारे नगराध्यक्षा माधवी कदम यांनी केली.

नगराध्यक्षा कदम यांनी नगरविकास विभागाचे सचिव यांना लिहिलेल्या पत्रात म्हटले आहे, की नगरविकास विभागाच्या संदर्भ पत्रानुसार कोरोना विषाणू संक्रमणाच्या पार्श्वभूमीवर शासनाकडून सामाजिक अंतर व अनुषंगाने मार्गदर्शन सूचनेप्रमाणे स्थानिक स्वराज संस्थांनी सभा, बैठका पुढील आदेश येईपर्यंत व्हीसीवरच घेण्यात याव्यात, असे आदेशीत केले आहे. सातारा नगरपालिकेची स्थायी समितीची सभा ता. 13 व 14 ऑगस्ट रोजी व्हीसीद्वारे घेण्यात आली होती. मात्र, नेटवर्क कम्युनिकेशनमध्ये व्यत्यय आल्याने ता. 13 रोजी सभा तहकूब करून ता. 14 रोजी घेण्यात आली. त्या सभेत खूप व्यत्यय येत होता. 

सातारच्या इतिहासात आठ सप्टेंबरला विशेष महत्त्व; जाणून घ्या कारण

स्थायी समितीच्या सदस्यांची संख्या दहा असताना व्हीसीवर खूप व्यत्यय येत होता. पालिकेचे नगरसेवक 44 आहेत. त्यामुळे सभा पार पाडताना खूप अडचणी निर्माण होण्याची शक्यता आहे. यापूर्वी पालिकेने छत्रपती शाहू कला मंदिर येथे सोशल डिस्टनन्स पाळून प्रत्यक्ष उपस्थितीत ता. 10 जुलै रोजी घेण्याचे नियोजन केले होते. मात्र, शासन आदेशानुसार ती स्थगित करण्यात आली होती. त्यानंतर सभा घेण्यात आली नाही. तरी ही सभा व्हीसीऐवजी प्रत्यक्ष उपस्थितीत सोशल डिस्टनन्स पाळून घेण्याबाबत मार्गदर्शन मिळावे, अशी मागणी करण्यात आली आहे. दरम्यान, याबाबत संबंधित प्रशासन कोणती भूमिका घेते हे लवकरच स्पष्ट होणार आहे.