कऱ्हाड (जि. सातारा) : राज्यात महाविकास आघाडी सरकारची ता. 28 नोव्हेंबर रोजी वर्षपूर्ती होत आहे. वर्षभरात मोठ्या आव्हानांचा सामना करताना सरकारने चांगली कामगिरी केली आहे. त्यामुळे शिक्षकांचे, संस्था चालक व पदवीधरांचे प्रलंबित प्रश्न महाविकास आघाडी सरकार सोडविण्यास कटिबद्ध असेल, असा विश्वास माजी मुख्यमंत्री आमदार पृथ्वीराज चव्हाण यांनी केला. 

येथे पदवीधर व शिक्षक निवडणूक प्रचारार्थ झालेल्या सभा झाली. त्या वेळी ते बोलत होते. कृषी व सहकार राज्यमंत्री विश्वजित कदम, ज्येष्ठ नेते रघुनाथराव कदम, रयत सहकारी साखर कारखान्याचे अध्यक्ष उदयसिंह पाटील- उंडाळकर, किरण लाड, मलकापूरच्या नगराध्यक्षा नीलम येडगे, उपाध्यक्ष मनोहर शिंदे, महाराष्ट्र प्रदेश युवक कॉंग्रेसचे उपाध्यक्ष शिवराज मोरे, अजितराव पाटील, शहर कॉंग्रेसचे अध्यक्ष राजेंद्र माने, नगरसेवक इंद्रजित गुजर, मलकापूरचे नगरसेवक राजेंद्र यादव, अल्पसंख्याक जिल्हा कॉंग्रेसचे अध्यक्ष झाकीर पठाण, विठ्ठलराव शिखरे, महेंद्र भोसले, नंदकुमार पालकर उपस्थित होते. 

राष्ट्रवादीचे काही आमदार अपक्षांसोबत; संग्रामसिंह देशमुखांचा गौप्यस्फोट

आमदार चव्हाण म्हणाले, ""शेतकऱ्यांना कर्जमाफीचा निर्णय असो, नियमित कर्ज परतफेड करणाऱ्या शेतकऱ्यांना प्रोत्साहन पॅकेज असो, कोरोनाच्या परिस्थितीत राज्यातील जनतेला वेळोवेळी सुविधा देण्यात राज्य सरकार अग्रभागी होते. अशा प्रश्नांच्या सोडवणुकीसाठी "महाविकास'ने प्रयत्न केले आहेत. तीन पक्षांचे महाविकास आघाडीचे सरकार आहे. पक्षीय पातळीवर पहिल्यादांच ही निवडणूक होत आहे. पक्षाची ताकद मागे असल्याने पदवीधर व शिक्षकांच्या प्रतिनिधींना पदवीधरांचे व शिक्षकांचे प्रश्न सोडविण्यासाठी ताकद मिळेल.'' 

पदवीधर निवडणूक भाजपला महाविकासची ताकद दाखवून देण्यासाठीच; रामराजेंचा विरोधकांना टोला

मंत्री कदम म्हणाले, "पदवीधर व शिक्षकांचे प्रश्न सोडवणुकीचा प्रयत्न त्यांच्या प्रतिनिधींनी करणे गरजेचे असते; परंतु असे प्रयत्न याआधी कधीही झाले नाहीत. त्यामुळेच पदवीधरांचे व शिक्षकांचे प्रश्न प्रलंबित आहेत. म्हणूनच भूलथापांना बळी न पडता महाविकास आघाडीच्या अधिकृत उमेदवारांना प्रथम क्रमांकाचे पसंती मत देऊन भरघोस मतांनी निवडून द्यावे.'' या वेळी ऍड. उदयसिंह पाटील, मनोहर शिंदे, किरण लाड, अजितराव पाटील आदींची भाषणे झाली. 

संपादन : बाळकृष्ण मधाळे