कऱ्हाड (जि. सातारा) : शेंद्रे ते कागल रस्त्यादरम्यान नागठाणे, माजगाव फाटा, इंदोली जंक्‍शन, मसूर फाटा, वाघवाडी फाटा येथे उड्डाणपूल होणे आवश्‍यक आहे. त्या कामांबरोबरच पंकज हॉटेल ते दुर्गा हॉटेल या लांबीत पारदर्शी उड्डाणपूल करा, अशा सूचना पालकमंत्री बाळासाहेब पाटील यांनी महामार्ग विभागाच्या अधिकाऱ्यांना केल्या. पाचवड फाटा, नारायणवाडी, आटके टप्पा येथील सेवा रस्त्यावरील तर कृष्णा कॅनॉल ते ओगलेवाडी दरम्यानच्या रस्त्यावरील साचणाऱ्या पाण्याचा प्रश्न मार्गी लावा, अशाही सूचना त्यांनी केल्या. 

मंत्री पाटील यांनी येथील शासकीय विश्रामगृहात अधिकाऱ्यांची बैठक घेण्यात आला. जिल्हा परिषदेचे शिक्षण व अर्थ समिती सभापती मानसिंगराव जगदाळे, माजी नगरसेवक गंगाधर जाधव, प्रांताधिकारी उत्तम दिघे, तहसीलदार अमरदीप वाकडे, महामार्ग प्राधिकरणाचे संचालक व्ही. डी. पंदारकर, उपअभियंता व्ही. एन. पाटील, वैभव एन. पाटील, निखिल पानसरे, एस. बी. डोंगरे, सल्लागार अभिजित यादव, बांधकाम विभागाचे उपअभियंता आर. जी. जाधव, वरिष्ठ पोलिस निरीक्षक बी. आर. पाटील, सहायक पोलिस निरीक्षक विजय गोडसे, प्रशांत यादव, सर्जेराव पानवळ आदी उपस्थित होते. 

राजकारणात मोठी घडामोड! कऱ्हाडात कट्टर विरोधक येणार एका व्यासपीठावर

पालकमंत्री पाटील म्हणाले, "शेंद्रे ते कागल रस्त्याच्या लांबीमध्ये नागठाणे, माजगाव फाटा, इंदोली जंक्‍शन, मसूर फाटा, वाघवाडी फाटा येथे दळणवळणाच्या दृष्टीने पारदर्शी उड्डाणपूल, पंकज हॉटेल ते दुर्गा हॉटेल या लांबीत पारदर्शी उड्डाणपूल होणे गरजेचे आहे. पाचवड फाटा व नारायणवाडी, आटके टप्पा या ठिकाणच्या सेवा रस्त्यावर साचणाऱ्या पाण्याचा निचरा होण्यासाठी आवश्‍यक त्या उपाययोजना कराव्यात.'' कृष्णा कॅनॉल ते ओगलेवाडीपर्यंतच्या रस्त्यावर पावसाळ्यातील पाण्याचा निचरा होत नाही. त्यामुळे वाहनधारक, तेथील नागरिक यांची मोठी गैरसोय होत आहे. त्याचा विचार करून तातडीने तो प्रश्न मार्गी लावावा, अशाही सूचना त्यांनी केल्या. 

संपादन : बाळकृष्ण मधाळे