सातारा: अल्पसंख्याक मंत्री नवाब मलिक यांना ईडीने अटक केली आहे. त्यामुळे त्यांचा मंत्रिपदाचा राजीनामा घ्यावा किंवा त्यांना मंत्रिमंडळातून बडतर्फ करावे, अशी मागणी सातारा शहर आणि तालुका भारतीय जनता पक्षाच्या वतीने करण्यात आली आहे. याबाबतचे निवेदन त्यांनी निवासी उपजिल्हाधिकारी सुनील थोरवे यांना दिले आहे. या निवेदनाच्या प्रती राज्यपाल आणि मुख्यमंत्र्यांकडे पाठविण्यासाठी जिल्हाधिकारी कार्यालयात देण्यात आल्या आहेत.

भाजपच्या वतीने दिलेल्या निवेदनात म्हटले, की कॅबिनेट मंत्री नवाब मलिक यांना ईडीने १९९३ बॉम्ब स्फोटातील गुन्हेगारांशी संबंधित मनी लाँडरिंगप्रकरणी अटक केली आहे. न्यायालयाने त्यांना तीन मार्चपर्यंत कोठडी दिली आहे. अनिल देशमुखांचा राजीनामा ताबडतोब घेणारे नवाब मलिकांच्या बाबतीत वेगळा निर्णय करत आहेत. राज्यासह देशातील सर्व नागरिकांच्या सुरक्षेचा हा प्रश्न आहे. त्यामुळे नवाब मलिकांचा राजीनामा होईपर्यंत भारतीय जनता पक्षाच्या वतीने निदर्शने केली जातील. याचा विचार करून मुख्यमंत्र्यांनी नवाब मलिक यांचा राजीनामा घ्यावा किंवा त्यांना मंत्रिमंडळातून बडतर्फ करावे, अन्यथा जनसामान्यांच्या होणाऱ्या उद्रेकास राज्य शासन जबाबदार राहील.satara

या वेळी भाजप सातारा शहराध्यक्ष विकास गोसावी, तालुकाध्यक्ष राजेंद्र इंगळे, शहर सरचिटणीस जयदीप ठुसे, विक्रांत भोसले, तालुका सरचिटणीस गणेश पालखे, युवा मोर्चा जिल्हाध्यक्ष नीलेश नलावडे, शहराध्यक्ष विक्रम बोराटे, महिला मोर्चा शहराध्यक्ष रिना भणगे, ओबीसी मोर्चा युवती जिल्हाध्यक्ष वनिता पवार, ओबीसी मोर्चा तालुकाध्यक्ष विक्रम पवार, स्वप्नील बोराटे, विजय गाढवे, विक्रम अवघडे, तेजस काकडे, हेमंत शिंदे, अविनाश खार्शिकर, ॲड. सचिन तिरोडकर, आशुतोष चौधरी, स्वप्नील लोखंडे आदी उपस्थित होते.