तारळे (सातारा) : मुसळधार पावसामुळे (Heavy Rain) तारळे विभागातील दरड कोसळण्याचा (Patan Taluka Landslide) धोका असलेल्या गावांतील नागरिकांना सुरक्षिततेसाठी तातडीने स्थलांतरीत करण्यात आले आहे. बाधित गावांचा संभाव्य धोका लक्षात घेऊन अतिवृष्टीने व भूस्खलन झालेल्या बाधित गावांचे भूगर्भतज्ञांच्या समितीमार्फत सर्वेक्षण करण्यात येईल. त्यानंतर त्या गावांचे कायमस्वरूपी पुनर्वसन करण्यात येईल. तोपर्यंत तात्पुरती निवाऱ्याची व्यवस्था करण्यात येईल, अशी ग्वाही गृहराज्यमंत्री शंभूराज देसाई (Minister Shambhuraj Desai) यांनी दिली.

तारळे विभागातील अतिवृष्टीने बाधित गायमुखवाडी, कळंबे, डफळवाडी, केंजळवाडी, बागलेवाडी, जळव गावांची पहाणी व स्थलांतरीत नागरिकांच्या भेटीप्रसंगी ते बोलत होते. अभिजित पाटील, बबनराव शिंदे, गजाभाऊ जाधव, सोमनाथ खामकर, संजय देशमुख, रणजित शिंदे, विजय पवार, नामदेवराव साळुंखे, माणिक पवार, किशोर बारटक्के, दीपक यादव, मंडलाधिकारी सीताराम कदम, तलाठी सचिन शेटे, श्री. घोरपडे, बांधकामचे अभियंता ए. बी. घोडके, संदिप पाटील, महावितरणचे अभियंता धर्मे, सहाय्यक पोलिस निरीक्षक अजय गोरड, विविध खात्यांचे अधिकारी व ग्रामस्थ उपस्थित होते.

मंत्री देसाई म्हणाले, जुलैत अतिवृष्टीने डोंगरी व दुर्गम भागातील अनेक गावांवर भूस्खलन होऊन दरडी कोसळण्याचा धोका निर्माण झाला. अशा गावांना सुरक्षित ठिकाणी तातडीने स्थलांतरीत केले असून त्यांना शासनाकडून आवश्यक सुविधा दिल्या आहेत. सध्या शासकीय यंत्रणेकडून अतिवृष्टीने झालेल्या नुकसानीचे पंचनामे करण्याबरोबरच बाधित झालेल्या गावांचे तात्पुरते पुनर्वसन करण्याचे काम सुरु आहे. भविष्यात दरडी कोसळण्याचा संभाव्य धोका लक्षात घेऊन त्यांचे सुरक्षित ठिकाणी कायमस्वरुपी पुनर्वसन करण्यात येईल. नुकसानीचे पंचनामे दोनच दिवसात पूर्ण करा. भूस्खलन झालेल्या बाधित गावांचे भूगर्भतज्ञांच्या समिती मार्फत सर्वेक्षण करण्यात येईल. त्यानंतर त्या गावांचे कायमस्वरूपी पुनर्वसन करण्यात येईल, असेही त्यांनी सांगितले.