सातारारोड : राज्यामध्ये सत्तारूढ महायुतीचे आमदार ज्या पद्धतीने मारा, झोडा, फोडा, तोडाची भाषा करत आहेत, त्यावरून त्यांच्यावर कोणतेही नियंत्रण राहिले नसल्याचे आणि राज्यात कायदा व सुव्यवस्थेचा बोजवारा उडाल्याचे दिसते. या वाचाळवीरांना जनता मतांद्वारेच फोडून काढेल, अशा शब्दांत आमदार शशिकांत शिंदे यांनी पत्रकारांशी बोलताना गोपीचंद पडळकर, सदाभाऊ खोत यांच्यासह महायुतीच्या आमदारांकडून शरद पवार यांच्याबरोबरच महाविकास आघाडीच्या नेत्यांवर केल्या गेलेल्या टीकेचा खरपूस समाचार घेतला आहे.

शरद पवार यांच्यामुळेच पुरोगामी राज्याला जातिवादाने ग्रासले आहे, अशी टीका आमदार गोपीचंद पडळकर यांनी केली आहे. त्याचबरोबर आमदार सदाभाऊ खोत यांनीही महाविकास आघाडीच्या नेत्यांवर टीका केली आहे. मराठा समाजाला पाठिंबा असल्याचे पत्र महाविकास आघाडीच्या नेत्यांनी द्यावे. त्यांनी आग लावण्याचे धंदे बंद करावेत, असे विधान आमदार खोत यांनी केले आहे.

पडळकर, खोत यांच्यासह महायुतीच्या आमदारांकडून शरद पवार यांच्याबरोबरच महाविकास आघाडीच्या नेत्यांवर केल्या गेलेल्या टीकेचा समाचार घेताना आमदार शशिकांत शिंदे म्हणाले, ‘‘शरद पवार यांचे राज्यासाठीचे योगदान विरोधकांना काय कळणार? आता निवडणुका आल्याने काही जणांना बोलायला सांगितले गेले असेल. ते जेवढे बोलतील, तेवढी शरद पवार यांच्याविषयीची आपुलकी वाढेल. मराठा आरक्षणाला सर्वच पक्षांच्या आमदारांनी पाठिंबा दिला आहे. त्यामुळे महाविकास आघाडीने पुन्हा स्वतंत्र पत्र देण्याचा प्रश्न येतो कुठे?

तुमच्या सरकारच्या हातामध्ये असताना तुम्हाला जमत नसेल, तर तुम्ही सरकारमधून खाली व्हा. मग निर्णय काय घ्यायचा, तो आम्ही घेऊ. आता एकमेकांवर टोलवाटोलवी करत तुम्ही वाद लावत बसला आहात. जातिवादाची बीजे पेरून समाजा-समाजात तेढ निर्माण करण्याचे कारस्थान बंद करावे, अन्यथा या निवडणुकीत लोक तुम्हाला मतांद्वारेच फोडून काढतील.’’

शरद पवार यांची भीती...

शरद पवार यांनी राज्यात सुरू केलेल्या दौऱ्यामुळे विरोधकांमध्ये भीतीचे वातावरण निर्माण झाले आहे. त्यामुळेच अशा वाचाळवीरांना पुढे केले जात असल्याचे आमदार शिंदे यांनी नमूद केले.