उंब्रज (सातारा) : महाराष्ट्र नवनिर्माण सेनेचे (MNS) अध्यक्ष राज ठाकरे (Raj Thackeray) यांचे येथे मनसेचे जिल्ह्यातील पदाधिकारी व कार्यकर्ते यांनी जल्लोषात स्वागत केले. दरम्यान, राज ठाकरे यांचा नियोजित रत्नागिरी दौऱ्यात पुण्यानंतर थेट उंब्रज येथे स्वागतासाठी थांबणार असल्याने मनसेचे पदाधिकारी व कार्यकर्ते यांची मोठ्या प्रमाणात गर्दी झाली होती.

काल (शुक्रवार) राज ठाकरे रत्नागिरी दौऱ्यावर (Raj Thackeray on Ratnagiri Tour) जाताना दुपारी एक वाजता कार्यकर्ते यांच्या आग्रहाखातर उंब्रज येथे स्वागतासाठी थांबणार होते. दुपारी एक वाजता येणारे राज ठाकरे यांचे साडेतीन वाजता उंब्रज (Umbraj) येथे आगमन झाले. त्यांचे येथे आगमन होताच त्यांना भेटण्यासाठी जिल्हा व तालुक्यातून आलेले मनसेचे पदाधिकारी व कार्यकर्ते यांनी एकच गर्दी केली होती.

फटाक्यांच्या आतषबाजीत राज ठाकरे यांचे स्वागत करण्यात आले. या वेळी मनसेचे विद्यार्थी सेनेचे जिल्हा उपाध्यक्ष अमोल कांबळे, तालुकाध्यक्ष रणजित कदम, विजय वाणी, मीनाक्षीताई पोळ आदींनी त्यांचे स्वागत केले. या वेळी पदाधिकारी व कार्यकर्ते यांनी गर्दी केल्याने राज ठाकरे यांनी आपल्या कारच्या बाहेर येऊन कार्यकर्त्यांना हात जोडत नमस्कार करून रत्नागिरीकडे रवाना झाले.