मोरगिरी (जि. सातारा) : चांगली पिके येऊन देखील पशुपक्षी, वानर, साळिंदर, रानडुकरे या पिकांवर हल्ला करून पिकांची नासाडी करत असल्याने शेतकरी हैराण होतात. यावर उपाय म्हणून नाटोशी (ता. पाटण) येथील मोहन शंकर जाधव या तरुणाने अगदी स्वस्तात तोफेसारखे आवाज बनवणारे उपकरण बनवले आहे. यामधून होणाऱ्या आवाजाने वन्यप्राणी, पक्षी यांना कोणतीही इजा किंवा धोका होत नाही. वन्यप्राणी पळून गेल्याने पिकांचे संरक्षण होत आहे. 

घरची परिस्थिती बेताची असल्याने जाधव या तरुणाने बीकॉम शिक्षण अर्धवट सोडून मुंबई येथे छोट्या खासगी कंपनीत नोकरी केली. कोरोनाच्या प्रादुर्भावामुळे ते काम सुटले. घरी बसून काय करायचे म्हणून ते आपल्या वडिलांना शेतीच्या कामात मदत करायचे. शेतीमध्ये पिके चांगली येऊन सुद्धा या चांगल्या आलेल्या पिकांवर डोंगरातून आलेले वन्यप्राणी, हल्ला करून चांगल्या पिकांच्या नुकसान करायचे. यामुळे शेतकरी मेटाकुटीला आला आहे. 

शेतकऱ्यांच्या मदतीसाठी सरकार कटिबद्ध : गृह राज्यमंत्री देसाई

त्यामुळे पिकांच्या रक्षणासाठी तोफ करण्याचा निर्णय घेतला व केवळ 200 रुपयांमध्ये शेतीचे नुकसान करणाऱ्या वन्यप्राणी आणि पशुपक्ष्यांना पिकांपासून लांब घालविण्यासाठी तोफ बनवली. यासाठी लागणारे साहित्य 2.5 इंची 1 फूट पीव्हीसी पाइप, 2 इंची 1.5 फूट पीव्हीसी पाइप 2.5 इंची पीव्हीसी पाइप कॅप 2.5 बाय 2 कपलिंग गॅस लाईटर, एमसील, पीव्हीसी सोल्युशन ट्यूब हे साहित्य लागत असून, या उपकरणातून होणाऱ्या आवाजाने वन्यप्राणी, पक्ष पळून जातात. कोणतीही इजा किंवा धोका होत नसल्याचे श्री. जाधव या तरुणाने सांगितले. 

संपादन : बाळकृष्ण मधाळे