सातारा : क्रीडा संकुलावरून (Satara Sports Complex) आज भाजपचे खासदार उदयनराजे भोसले (MP Udayanraje Bhosale) प्रचंड संतप्त झाल्याचे पहायला मिळाले. साताऱ्यातील स्टेडियमचं वाट्टोळं करणाऱ्यांना मुस्काडलं पाहिजे, असा संताप उदयनराजे भोसले यांनी व्यक्त केला. उदयनराजेंचा हा रोख उपमुख्यमंत्री अजित पवार (Ajit Pawar) यांच्या दिशेने असल्याची जोरदार चर्चा सुरू झालीय. साताऱ्यातील जागा नेते, पुढारी लोक हडपत असल्याचा आरोपही त्यांनी यावेळी केला.

सातारा एसटी स्टॅण्डनजीक उभारलेल्या क्रीडा संकुलबाबत आज उदयनराजेंनी संतप्त प्रतिक्रिया दिली. उदयनराजे म्हणाले, संकुल चुकीच्या पद्धतीनं उभं करण्यात आलंय. आधी रणजी ट्रॉफी शाहू स्टेडियमवर भरवल्या जात होत्या. आता साधी रणजी ट्रॉफीची मॅच देखील जिंकू शकत नाही, अॅथेलेटिक्स जिंकत नाही, नेमकं काय चाललंय?, असा सवाल त्यांनी उपस्थित केला.

सातारा प्राईम एरिया आहे. एवढं असताना संकुल उभारलं गेलं नाही. बी. जी. शिर्केंनी बालेवाडीचं स्टेडियम कॉमन वेल्थसाठी बांधलं होतं. त्यांनी आपल्या संकुलासाठी निघालेल्या टेंडरसाठी फॉर्म भरला होता. हे का सांगतोय, कारण हे मीडियात आलं पाहिजे म्हणून.. हे आमदार, खासदार जी सो कॉल्ड माकडं आहेत, या सगळ्यांनी त्यातून बोध घ्यायला हवा. राजकारणापलिकडे जाऊन विचार करायला पाहिजे. स्पोर्ट्स आणि इतर ठिकाणी राजकारण आणू नये. जे स्टेडियमचं वाट्टोळं करत आहेत, त्यांना मुस्काडलं पाहिजे, असा संतापही त्यांनी शेवटी व्यक्त केला.