सातारा : मार्च महिन्यापासून कोरोना संक्रमणाविरुद्ध आरोग्यविषयक विविध उपाययोजनांची ढाल घेऊन "महावितरण'चे कर्मचारी सातारा जिल्ह्यातील सुमारे 13 लाख वीजग्राहकांचा वीजपुरवठा सुस्थितीत होण्यासाठी अहोरात्र व अविश्रांत सेवा देत आहेत. यंदा नैसर्गिक आपत्तीमुळे अत्यंत खडतर परिस्थिती उद्भवलेली असताना त्यावर यशस्वी मात करीत सर्व प्रकारच्या वीजग्राहकांना सेवा देण्याची कामगिरी "महावितरण'चे कर्मचारी बजावत आहेत. खडतर परिस्थितीत कोरोनाविरुध्द "ढाल' घेऊन लढताना दिसत आहेत.
मार्च महिन्यापासून कोरोनाने थैमान घातले आहे. यावेळी संपूर्ण देश लॉकडाउन झाला असताना "महावितरण'च्या कर्मचाऱ्यांनी बहुतांशी ठिकाणी कामावर हजर राहत वीज पुरवठा सुरळीत ठेवण्याचा प्रयत्न केला होता. सातारा जिल्ह्यात पाच विभागीय तर 23 उपविभागीय कार्यालये आहेत. मात्र, कोरोनाशी लढताना आतापर्यंत महावितरणच्या विविध विभागीय कार्यालयांतील 68 कर्मचारी कोरोनाबाधित झाले, तर 54 कर्मचाऱ्यांनी कोरोनावर यशस्वी मात केली असून, 12 कर्मचारी उपचार घेत आहेत. आतापर्यंत दोन कर्मचाऱ्यांचा मृत्यू झाला आहे. तसेच काही अधिकारी, कर्मचारी कोरोनामुळे क्वॉरंटाइन आहेत. मात्र, कोरोनाशी झुंज देणाऱ्या कर्मचाऱ्यांनी कर्तव्य बजावत "महावितरण"ने ग्राहक सेवेवर कोणताही परिणाम होऊ दिला नसल्याचे दिसून आले.
उपकार्यकारी अभियंता प्रशांत वाघ म्हणाले, "कोरोनाच्या संकटकाळात महावितरण कर्मचाऱ्यांनी अहोरात्र मेहनत घेतली. प्रामुख्याने पावसाळ्यात कास व इतर डोंगराळ भागात संततधार पावसात काम करत होते. एका बाजूला कोरोनाशी लढा तर दुसऱ्या बाजूला पावसाशी सामना करत कर्मचारी काम करत होते.'' कोरोना संक्रमणात उन्हाळा ते पावसाळ्यातील पाच ते सहा महिन्यांचा कालावधी अतिशय आव्हानात्मक व खडतरपणे महावितरण कर्मचाऱ्यांनी लढा दिला. उन्हाचा तडाखा, तापलेली वीजयंत्रणा, वाढलेली विजेची मागणी त्यानंतर वादळे, मॉन्सूनपूर्व धुवाधार पाऊस व त्यानंतरचा संततधार पाऊस अशा नैसर्गिक प्रतिकूल परिस्थितीत वीजपुरवठा सुरळीत ठेवण्यासाठी महावितरणचे कर्मचारी सज्ज होते.
'महावितरण'चे कर्मचारी कोरोनाशी सामना करत कर्तव्य बजावत आहेत. मार्च महिन्यापासून आतापर्यंत ग्राहकांच्या सेवेसाठी कर्मचारी सज्ज आहेत. तसेच जिल्ह्यातील सर्व कार्यालयांमध्ये अधिकारी, कर्मचारी व वीजग्राहकांसाठी कोरोनाविषयक उपाययोजनांसह सोशल डिस्टन्सिंगचे काटेकोरपणे पालन करत आहेत.
-गौतम गायकवाड, अधीक्षक अभियंता, महावितरण
संपादन : बाळकृष्ण मधाळे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.