कऱ्हाड - प्रवाशांची अतिरिक्त गर्दी लक्षात घेऊन छत्रपती शिवाजी महाराज टर्मिनस मुंबई ते कोल्हापूर विशेष शुल्कावर एक एकेरी अतिजलद विशेष गाडी चालवण्याचा निर्णय मध्य रेल्वेने घेतला आहे. मंगळवारी (ता. २०) ही विशेष रेल्वे गाडी धावणार आहे.

मध्य रेल्वेकडुन त्याबाबतची माहिती देण्यात आली आहे. त्यामध्ये प्रवाशांची सध्या गर्दी वाढली आहे. त्याचा विचार करुन प्रवाशांच्या सोयीसाठी छत्रपती शिवाजी महाराज टर्मिनस मुंबई ते कोल्हापूर दरम्यान अतिजलद एकेरी विशेष गाडी क्रमांक (01099) ही मंगळवारी दुपारी साडेबारा वाजता छत्रपती शिवाजी महाराज टर्मिनस मुंबई येथून सुटेल आणि त्याच दिवशी रात्री साडेअकरा वाजता ती कोल्हापुरच्या श्री छत्रपती शाहू महाराज टर्मिनसला पोहचणार आहे.

ती गाडी दादर, कल्याण, लोणावळा, पुणे, जेजुरी, लोणंद, सातारा, कराड, किर्लोस्करवाडी, सांगली, मिरज, हातकणंगले आणि कोल्हापूर येथे थांबणार आहे. त्या गाडीला १७ डबे जोडण्यात येणार आहेत. त्यासाठी आजपासुन आरक्षण सुरु करण्यात आले आहे. प्रवाशांनी विशेष रेल्वे सेवेचा लाभ घ्यावा असे आवाहन रेल्वे प्रशासनाकडून करण्यात आले आहे.