कऱ्हाड : विजय शिवतारे (Vijay Shivtare) यांच्या वक्तव्याबाबत मला काहीच बोलायचं नाही. सुसंस्कृतपणा सर्वांनी दाखवावा, असे माझे मत आहे. त्यांच्यासंदर्भात पक्षाचे वरिष्ठ काय तो निर्णय घेतील. राष्ट्रवादी कॉंग्रेस पक्ष, शिवसेना, भाजप या तिन्ही पक्षांसह महायुतीतील घटक पक्षांचे नेते, कार्यकर्त्यांनी वातावरण खराब होईल असे कोणतेही वक्तव्य करु नये, अशी माझी भावना आहे, अशा शब्दांत विजय शिवतारे यांच्या वक्तव्याबाबत निशाना साधत अधिक बोलणे पवारांनी (Ajit Pawar) टाळले.

उपमुख्यमंत्री अजित पवार यांनी सासवडच्या पालखी तळावरून ‘विजय शिवतारे, तू निवडून कसा येतो, तेच मी पाहतो,’ असे म्हंटले होते. तो शिवतारेंचा अपमान नव्हता, तर पुरंदरच्या स्वाभिमानी जनतेचा अपमान होता. आता त्याचा बदला घेण्याची वेळ आली आहे, असे थेट इशारा शिवसेना (Shiv Sena) नेते तथा माजी मंत्री विजय शिवतारे यांनी अजितदादांना दिला आहे.

त्याचबरोबर शिवतारे यांनी अजित पवारांनी पालखीतळावर येऊन माफी मागावी, अशीही मागणी केली आहे. त्यांच्या वक्तव्यावर आज अजित पवार यांना विचारले असता ते म्हणाले, विजय शिवतारे यांच्या वक्तव्याबाबत मला काहीच बोलायचे नाही. त्यासंदर्भात पक्षाचे वरिष्ठ काय तो निर्णय घेतील. सुसंस्कृतपणा सर्वांनी दाखवावा, असे माझे मत आहे. राष्ट्रवादी कॉंग्रेस पक्ष, शिवसेना, भाजप तिन्ही पक्षांसह महायुतीतील घटक पक्षांचे नेते, कार्यकर्त्यांनी वातावरण खराब होईल, असे कोणतेही वक्तव्य कोणीही करु नये, असाही सल्ला त्यांनी यावेळी दिला.

निलेश लंकेंची स्पष्ट भूमिका

निलेश लंके यांच्याबद्दल माध्यमांतच चर्चा सुरु आहे, त्यात तथ्य नाही असे सांगुण उपमुख्यमंत्री पवार म्हणाले, निलेश लंके यांनी माध्यमांना काय सांगायचे ते सांगितले आहे. मीही त्यांची चर्चा ऐकली आहे. ज्याच्याबद्दल चर्चा सुरु आहे, त्यांनीच उत्तर दिले असताना त्यावर मी उत्तरे देण्याचे काही कारण नाही, अशी स्पष्टोक्ती उपमुख्यमंत्री पवार यांनी केली.