ओगलेवाडी (जि. सातारा) : परिसरातील विस्तारीकरण व गुन्हेगारीचे वाढते प्रमाण लक्षात घेता शासनाने येथील पोलिस औट पोस्टला पोलिस ठाण्याचा दर्जा देण्याची मागणी आहे. पोलिस ठाण्यांचा प्रस्ताव शासनाकडे अनेक वर्षे प्रलंबित आहे. सातारा जिल्ह्यातील मल्हारपेठ पोलिस दूरक्षेत्राचे नवीन पोलिस ठाणे करण्याच्या मागणीला गृहखात्याने मान्यता दिली आहे. त्यात येथील पोलिस दूरक्षेत्राचा समावेश नसल्याने परिसरातील लोकांची नाराजी आहे. 

ब्रिटिशकाळामध्ये कऱ्हाड रेल्वे स्थानकाजवळ पूर्वी अनेक वर्षे येथील औट पोस्ट होते. ते गावाच्या बाहेर असल्यामुळे लोकांची गैरसोय होत होती. लोकांच्या मागणीवरून नंतर 1999 च्या सुमारास ते गावाच्या मध्यभागी खासगी जागेत भाड्याने कार्यरत आहे. पोलिस दूरक्षेत्राच्या या इमारतीची सध्या दुरवस्था झाली आहे. वीज, पाणी, स्वच्छतागृहांची गैरसोय आहे. पोलिस ठाण्यासमोर घाणीचे साम्राज्य पसरले आहे. व्यवसायांचेसुद्धा अतिक्रमण आहे. पोलिसांना राहण्याच्या खोल्या नाहीत.

माणला शेतकऱ्यांची धांदल; कांदा, बाजरीसह घेवड्याचे मोठे नुकसान

औट पोस्टच्या कार्यक्षेत्रात हजारमाची, बाबरमाची, वनवासमाची, राजमाची, गजानन सोसायटी, विरवडे, बनवडी अशी सात गावे असून, लोकसंख्या 40 हजारांवर आहे. त्यामानाने कर्मचारी वर्ग अपुरा आहे. फौजदार एक, हवालदार दोन, कॉन्स्टेबल तीन अशी अपुरी संख्या आहे. या परिसरात रेल्वे स्थानक, महाविद्यालय, वीज वितरण कार्यालय, औद्योगिक वसाहत, टेंभू प्रकल्प कार्यालय, बाजारपेठ, सदाशिवगड जानाईदेवी मंदिर तसेच गावालगत सुर्ली व शामगाव घाट असल्याने लोकांची वर्दळ वाढली आहे. बाजारपेठेत वाहतुकीची कोंडी असते. पोलिसांचा कामाचा व्याप व ताण पाहता नव्या स्वतंत्र पोलिस ठाण्याची गरज आहे. 

गुन्हेगारांवर वचक निर्माण करुन जनतेचा विश्वास जिंका : पृथ्वीराज चव्हाण

गावाजवळ 40 एकरांत सुमारे 550 कोटी रुपयांचे जागतिक पातळीवरील भूकंप संशोधन केंद्र व विद्यापीठ होणार आहे. त्या पार्श्वभूमीवर शासनाने सध्याच्या पोलिस औट पोस्टचे स्वतंत्र पोलिस ठाणे करणे गरजेचे व अत्यंत आवश्‍यक आहे. 
-प्रशांत यादव, अध्यक्ष, कऱ्हाड तालुका राष्ट्रवादी युवक कॉंग्रेस  

संपादन : बाळकृष्ण मधाळे