काशीळ : जिल्ह्यातील १३ साखर कारखान्यांचे ऊस गाळप सुरू आहे. सर्व कारखान्यांनी आतापर्यंत ९४ लाख ६७ हजार ३८६ टन उसाचे गाळप केले असून, त्यातून एक कोटी २० लाख ५ हजार ६१० क्विंटल साखरेचे उत्पादन झाले आहे. जिल्ह्यात यंदा सरासरी १०.७८ टक्के साखर उतारा मिळत आहे. जिल्ह्याची साखरनिर्मितीत एक कोटी क्विंटलवर साखरनिर्मिती टप्पा पार केला आहे. अजूनही जिल्ह्यात मोठ्या प्रमाणात ऊस शिल्लक असल्याने मे महिन्यापर्यंत ऊस गाळप हंगाम सुरू राहणार आहे.

जिल्ह्यातील सहा सहकारी व सात खासगी कारखान्यांकडून गाळप केले जात आहे. या गाळपात ‘जंरडेश्वर’ या कारखान्याने आघाडी घेतली आहे. या कारखान्याने सर्वाधिक १५ लाख ५९ हजार २४० टन उसाचे गाळप केले असून, १७ लाख १९ हजार ५०० क्विंटल साखरेचे उत्पादन घेतले आहे. ‘सह्याद्री’ने साखर उताऱ्यात आघाडी घेतली आहे. या कारखान्याने १२.५९ टक्के, तर सर्वांत कमी साखर उतारा ‘श्री दत्त इंडिया’चा ९.०३ टक्के आहे.

जिल्ह्यात एकूण गाळपापैकी सहा सहकारी कारखान्यांनी ३९ लाख ४३ हजार ५ टन ऊस गाळप करून ४६ लाख २० हजार ६१० क्‍विंटल साखरनिर्मिती केली आहे. सात खासगी कारखान्यांनी ५५ लाख २४ हजार ३८१ टन ऊस गाळपाद्वारे ५५ लाख ८५ हजार क्विंटल साखरनिर्मिती केली आहे. शिल्लक उसाच्या क्षेत्राचा विचार करता कारखान्यांचा मे महिन्याच्या अखेरपर्यंत हंगाम चालेल, असा अंदाज आहे. या हंगामात साखरनिर्मितीत एक कोटी क्विंटलचा टप्पा पार केला आहे. सर्व ऊस गाळप झाल्याशिवाय गाळप बंद न करण्याचा सूचना देण्यात आल्यामुळे या हंगामात सर्वाधिक साखरनिर्मिती होण्याचा अंदाज तज्ज्ञांकडून व्यक्त केला जात आहे.

तोडणीसाठी शेतकऱ्यांना आर्थिक फटका

ऊस गाळप हंगाम अंतिम टप्प्यात आल्याने, तसेच पाण्याची टंचाई भासू लागल्याने लवकरात लवकर ऊस तुटला जावा, यासाठी साखर कारखाने, तसेच चिटबॉयकडे शेतकऱ्यांकडून चकरा घातल्या जात आहेत. या शेतकऱ्यांच्या असहायतेचा फायदा ऊसतोड मजुरांकडून घेतला जात आहे. या ऊसतोड मजुरांकडून एकरी चार ते पाच हजार रुपयांची मागणी केली जात आहे.