मलकापूर : लहान मुलांमध्ये झालेल्या भांडणाचा राग मनात धरून चार जणांनी एकावर धारदार शस्त्राने वार करून गंभीर जखमी केले. आज सकाळी अकराच्या सुमारास येथील मलकापूर (Malkapur) फाट्यावर घटना घडलीय. भरदिवसा व शहरातील मुख्य चौकात घडलेल्या घटनेनं वातावरणात तणाव होता.

विश्वास येडगे (वय 29, रा. मलकापूर) असे जखमीचे नाव आहे. घटनास्थळावरून मिळालेली माहिती अशी : लहान मुलांमध्ये झालेल्या भांडणाचा राग मनात धरून बुधवारी सकाळी पावणे अकरा वाजण्याच्या सुमारास चार ते पाच जणांनी येडगे यांच्यावर हल्ला केला. धारदार शस्त्राने येडगे यांच्या पोटावर व शरीरावर वार करून त्याला गंभीर जखमी केले. या हल्ल्यात विश्वास हा मलकापूर फाटा येथे भररस्त्यावर रक्ताच्या थारोळ्यात पडला होता.

दरम्यान, घटनेनंतर हल्लेखोरांनी घटनास्थळावरून पलायन केलं. परिसरातील नागरिक व व्यापाऱ्यांनी जखमी विश्वासला उपचारासाठी त्वरित कृष्णा रुग्णालयात (Krishna Hospital Karad) हलवलंय. घटनेची माहिती मिळताच पोलीस उपाधीक्षक डॉ. रणजीत पाटील, कराड शहर पोलीस (Karad City Police) ठाण्याचे वरिष्ठ पोलीस निरीक्षक बी. आर. पाटील यांच्यासह पोलीस फौजफाटा घटनास्थळी दाखल झाला आहेत.