काशीळ (सातारा) : कोरोनाचा (corona) संसर्ग कमी झाला असला, तरी धोका कायम असल्याने गणेशोत्सवात वाढ होऊ नये, यासाठी बोरगाव पोलिस ठाण्याकडून ‘एक गाव, एक गणपती’ हा उपक्रम हाती घेण्यात आला आहे. त्यासाठी गावोगावी गणेश उत्सव मंडळाच्या पदाधिकाऱ्यांच्या बैठका घेऊन जनजागृत्ती केला जात आहे.

सध्या कोरोना रुग्णाचे आकडे घटत असलेतरी धोका कायम आहे. या पार्श्‍वभूमीवर बोरगाव पोलिस ठाण्यांतर्गत येणाऱ्या गावात ‘एक गाव, एक गणपती’ योजनेतून सार्वजनिक उत्सवासंबंधी सहायक पोलिस निरीक्षक डॉ. सागर वाघ यांनी गावोगावी बैठकांचे सत्र सुरू केले आहे. मंडळांच्या पदाधिकाऱ्यांच्या बैठका घेऊन हा उपक्रम राबविण्याबाबत मार्गदर्शन केले जात आहे. या उपक्रमास प्रतिसाद देणाऱ्या प्रत्येक मंडळाच्या पदाधिऱ्यांचा रोपे देऊन सत्कारही केला जात आहे.

नागठाणे, अतीत, काशीळ, कोपर्डे आदी गावांत बैठका झाल्या असून, या उपक्रमास मंडळाच्या प्रतिनिधींचाही प्रतिसाद मिळत आहे. काशीळला झालेल्या बैठकीस डॅा. वाघ, सरपंच सुभाषराव जाधव, जयवंत कुंभार, सुरेश माने, भरत माने, विश्वासराव जाधव, महेंद्र कांबळे, बीट अंमलदार बाबा महाडिक, विजय साळुंखे, पोलिस पाटील अजित कांबळे, धनंजय तळेकर, श्रीजीत नायर, ग्रामसेवक रमेश गायकवाड आदी उपस्थित होते. उत्सव काळात संसर्ग टाळण्यासाठी ‘एक गाव, एक गणपती’ हा उपक्रम हाती घेण्यात आला आहे. उत्सवाचे नियोजन करण्यासाठी बैठका घेण्यावर भर दिला आहे. या बैठकांना गणेश उत्सव मंडळांकडून चांगला प्रतिसाद मिळत आहे, अशी माहिती डॉ. सागर वाघ यांनी दिली.