कोरेगाव : प्रधानमंत्री किसान सन्मान निधी योजनेत सहभागी झालेल्या कोरेगाव तालुक्यातील ज्या लाभार्थ्यांची ई-केवायसी झालेली नाही, त्यांची ती त्वरित करून घेण्याबाबत जागृती करण्याची जबाबदारी येथील तहसीलदार अमोल कदम यांनी तालुक्यातील गावोगावचे सरपंच, उपसरपंच, तलाठी, ग्रामसेवकांसह इतरांवर सोपवली आहे.

प्रधानमंत्री किसान सन्मान निधी योजनेमधील लाभार्थींची ई-केवायसी करणे अनिवार्य आहे. मात्र, सध्‍या या योजनेमधील सुमारे २५ ते ३० टक्के लाभार्थींची ई-केवायसी पूर्ण झालेली नाही. ही बाब लक्षात घेऊन तहसीलदार श्री. कदम यांनी ई-केवायसी पूर्ण करून घेण्यासाठी तालुक्यातील सर्व ग्रामपंचायतींचे सरपंच, उपसरपंच, सर्व गावकामगार तलाठी, ग्रामसेवक, कृषी सहायक, सहकारी सेवा सोसायट्यांचे सचिव, सर्व पोलिस पाटील,

सर्व महा ई-सेवा केंद्रचालक व सर्व नागरी सेवा (सीएससी) केंद्रचालकांना पत्र पाठवले आहे. त्यात त्यांनी म्हटले आहे की, प्रधानमंत्री किसान

सन्मान निधी योजनेमधील लाभार्थींची ई-केवायसी करणे अनिवार्य आहे. त्यानुसार आपल्या कार्यक्षेत्रातील किसान सन्मान योजनेतील ज्या लाभार्थीनी अद्याप ई-केवायसी पूर्ण केली नाही, त्यांना नागरी सेवा केंद्रावर अर्थात सीएससी केंद्रावर अथवा पी. एम. किसान पोर्टलवर जावून ती करून घेण्याबाबत जागृती करावी व त्याबाबतचा अहवाल आपल्या कार्यालयाकडे त्वरित पाठवावा. तहसीलदार श्री. कदम यांनी या पत्रासोबत संबंधितांना त्यांच्या कार्यक्षेत्रातील ई- केवायसी पूर्ण करावयाची राहिलेल्या लाभार्थींची यादीही पाठवलेली आहे. पत्रात लाभार्थीना आपापल्या मोबाईलवरून ई-केवायसी कशी पूर्ण करावी, याबाबतची माहितीही सविस्तर दिलेली आहे.

कोरेगाव तालुक्यातील स्थिती...

प्रधानमंत्री किसान सन्मान योजना एकूण लाभार्थी खातेदार : ४२,९२९

ई-केवायसी पूर्ण झालेले एकूण लाभार्थी : ३०,१९९ (७० टक्के पूर्ण)

ई-केवायसी न झालेले एकूण लाभार्थी : १२,७३०