सातारा : राज्यातील 12 जिल्हा मध्यवर्ती सहकारी बँकांच्या (Satara Co-operative Bank) निवडणुकांसाठी काल सहकार निवडणूक प्राधिकरणाची बैठक झाली. यामध्ये निवडणुकीस पात्र जिल्हा बँकांच्या प्रारूप मतदार याद्यांचा कार्यक्रम सुरू करण्याची सूचना सहकार विभागाला देण्यात आली. त्यामुळे सप्टेंबरमध्ये मतदार यादीचा कार्यक्रम पूर्ण करून ऑक्टोबरमध्ये प्रत्यक्ष निवडणूक कार्यक्रम (Election Program) जाहीर केला जाणार आहे.

कोरोनामुळे जिल्हा बँकांच्या निवडणुका लांबणीवर पडल्या होत्या. गेल्या दीड वर्षात जिल्हा बँकांच्या संचालकांना १५ महिन्यांची मुदतवाढ मिळाली होती; पण आता कोरोनाचा संसर्ग कमी झाल्याने सहकार विभागाने निवडणूक कार्यक्रम घेण्याचा निर्णय घेतला. त्यानुसार काल सहकार निवडणूक प्राधिकरणाची बैठक झाली. या बैठकीत ज्या टप्प्यांवर निवडणूक थांबली होती. तेथून पुढे कार्यक्रम सुरू करण्याचा निर्णय झाला. राज्यातील १२ जिल्हा बँका या निवडणुकीसाठी पात्र असून, त्यांची प्रारूप यादी तयार करण्याची प्रक्रिया आता सप्टेंबरमध्ये होणार आहे. यामध्ये ठरावांची प्रक्रिया पूर्ण झालेल्यांची यादी तपासणीसाठी जिल्हा बँकांकडे पाठविली जाणार आहे. यामध्ये कच्ची यादी तयार करून ती प्रसिद्ध होईल. त्यावर हरकती व सुनावणीसाठी दहा दिवसांचा कालावधी असेल. त्यानंतर ही यादी सह निबंधकांकडे पाठविली जाईल. तेथून यादी तपासल्यानंतर प्रारूप यादी तयार करून ती प्रसिद्ध केली जाईल.

या यादीवर हरकती, सुनावणी होईल. त्यासाठी दहा दिवसांचा कालावधी असेल. त्यानंतर अंतिम यादी प्रसिद्धीनंतर प्रत्यक्ष निवडणुकीचा कार्यक्रम लावण्याची सूचना सहकार निवडणूक प्राधीकरण जिल्हा उपनिबंधकांना करेल. त्यानुसार ऑक्टोबरमध्ये प्रत्यक्ष निवडणुकीचा कार्यक्रम लागणार आहे. सप्टेंबरमध्ये प्रारूपाचा कार्यक्रम होणार आहे. एका वेळेस सर्व जिल्हा बँकांचे कार्यक्रम घेण्याची तयारी प्राधिकरणाने केली आहे. त्यामुळे जिल्हा बँकांच्या यादीची कार्यक्रम सुरू करण्याची सूचना प्राधिकरणाने सहकार विभागाला केली आहे.