केळघर (जि.सातारा) : कोरोनाचा हॉटस्पॉट झालेल्या जावळी तालुक्यातील पुनवडी गावातील 162 पैकी दोन जणांचा मृत्यू झाला असून आजअखेर 158 पॉझिटिव्ह रुग्ण बरे होऊन घरी परतले आहेत. यामुळे गावाला दिलासा मिळाला आहे. आता फक्त दोन जणांवर रुग्णालयात उपचार सुरू आहेत. रुग्णांची साखळी खंडित करण्यासाठी प्रशासनाचे प्रयत्नांना यश आले.
 
पुनवडी येथे आठ जुलै रोजी पहिला पॉझिटिव्ह रुग्ण आढळून आला होता. त्यानंतर रुग्ण वाढत गेली. रुग्णांची साखळी 162  पर्यंत पोचली. गावात बाधितांची संख्या वाढल्याने चिंतेचे वातावरण होते. साखळी खंडित करण्यासाठी तहसीलदार शरद पाटील, गटविकास अधिकारी सतीश बुद्धे, तालुका आरोग्य अधिकारी डॉ. भगवानराव मोहिते, वैद्यकीय अधिकारी डॉ. साधना कवारे, आरोग्य सहायक विशाल रेळेकर, सतीश मर्ढेकर, आरोग्य सेविका आस्मा शेख, आरोग्य सेवक मोहन शिंदे, आशा कविता पार्टे, अंगणवाडी सेविका संजना पार्टे यांनी मोलाचे प्रयत्न केले. अवघ्या तीन आठवड्यात पुनवडी येथील बाधितांनी कोरोनावर आपल्या इच्छाशक्तीद्वारे यशस्वीपणे मात केली आहे. सध्या दोनच ऍक्‍टिव्ह रुग्ण आहेत. प्रतिबंधित क्षेत्र असल्याने गाव निर्मनुष्य झाले होते. मात्र, गावाचे रुपडे लवकरच पालटणार असून, गाव कोरोनामुक्त होऊन पूर्वस्थितीत यावे, याचा ध्यास ग्रामस्थांनी घेतला आहे.

ब्युटीपार्लर व्यावसायिकांना हवी 15 हजार भरपाई, प्रांतांकडे साकडे

लई भारी...साताऱ्यातील पठ्ठ्याने पाणीपुरी विकून मिळविले दहावीत यश
 
कोरोनासदृश लक्षणे असलेल्यांची तपासणी करण्याचे काम व संशयित रुग्णांना पुढील उपचारासाठी संदर्भित करणे यासाठी आशा, आरोग्य सेविका, सेवक व अंगणवाडी सेविका काम करतात. स्वतःचा जीव धोक्‍यात घालून काम करून या घटकांनी पुनवडी येथील परिस्थिती पूर्वपदावर आणली आहे. याबाबत गटविकास अधिकारी सतीश बुद्धे म्हणाले पुनवडी येथे 162 पैकी दोन ऍक्‍टिव्ह रुग्ण असून, येथील ग्रामस्थांनी जिद्दीने कोरोनावर मात केली आहे.

Edited By : Siddharth Latkar