सातारा : इन्फोसिस फाउंडेशनच्या संस्थापिका, राज्यसभेच्या खासदार डॉ. सुधा मूर्ती (Dr. Sudha Murthy) यांनी खासदार उदयनराजे भोसले (Udayanraje Bhosale) यांच्या नवी दिल्ली येथील निवासस्थानी सदिच्छा भेट दिली. या प्रसंगी छत्रपती शिवाजी महाराज (Chhatrapati Shivaji Maharaj) यांचा पुतळा भेट देऊन उदयनराजेंनी त्यांचे स्वागत केले.

दरम्‍यान, इन्फोसिसच्या (Infosys) माध्यमातून साताऱ्यात आयटी कंपनी सुरू करण्यासाठी शासनाकडे पाठपुरावा करू, असे आश्वासित करून आयटीशी संबंधित केंद्र साताऱ्यात उभारण्याची मागणी खासदार उदयनराजे भोसले यांनी केली. यावेळी साताऱ्यात आयटी प्रकल्प उभारण्याबाबत डॉ. सुधा मूर्ती यांनी सकारात्मक प्रतिसाद दिला.

संसदेतील पहिल्याच भाषणात सुधा मूर्ती यांनी महिलांच्या आरोग्य, जागतिक वारसास्थळे, विशेषत छत्रपती शिवाजी महाराजांच्या गड, दुर्ग व देशांतर्गत पर्यटन या मुद्द्यांचा उल्लेख केला होता. त्याबद्दल उदयनराजे भोसले यांनी त्यांचे अभिनंदन केले.

या वेळी बोलताना डॉ. मूर्ती म्हणाल्या, ‘‘छत्रपती शिवाजी महाराजांनी अतिशय कमी कालावधीत रयतेचे राज्य निर्माण केले. जगाला हेवा वाटावा, असे अनेक पराक्रम केले. लोकशाहीचा पाया रचला. त्यांचा इतिहास जगाच्या कानाकोपऱ्यात पोचवण्याचे कार्य आपण केले पाहिजे.’’ डॉ. मूर्ती दांपत्‍याच्‍या इन्फोसिस कंपनीने देशाच्या विकासात मोलाचे योगदान दिल्याचे खासदार उदयनराजे भोसले यांनी सांगितले. या वेळी खासदार उदयनराजे भोसले यांनी साताऱ्यात आयटी पार्क उभारण्याच्या दृष्टीने राज्य शासनाबरोबर सुरू असलेल्या प्रयत्नांची कल्पना दिली.

इन्फोसिसच्या माध्यमातून साताऱ्यात आयटी कंपनी सुरू करण्यासाठी शासनाकडे पाठपुरावा करू, असे आश्वासित करून इन्फोसिसने आयटी क्षेत्राशी संबंधित केंद्र साताऱ्यात उभारण्याची मागणी खासदार उदयनराजे भोसले यांनी केली, तसेच साताऱ्याला भेट देण्याचे निमंत्रणही उदयनराजे यांनी दिले. प्रकल्प उभारण्यात सकारात्मक प्रतिसाद देऊन योग्य ती मदत करण्याचे आश्वासन डॉ. सुधा मूर्ती यांनी दिले. यावेळी प्रतापगड प्राधिकरणाचे सदस्य चंद्रकांत पाटील, सोमनाथ धुमाळ, छत्रपती संभाजी महाराज स्मारक समितीचे सदस्य संग्राम बर्गे, ॲड. विनीत पाटील, संदीप शिंदे आदी उपस्थित होते.