सातारा : सातारा जिल्हा हा केवळ एक भौगोलिक अस्तित्व नाही, तर तो मराठा साम्राज्याच्या वैभवशाली इतिहासाचा साक्षीदार आहे. छत्रपती शिवाजी महाराज व छत्रपती संभाजी महाराज या दोघांच्याही पदस्पर्शाने पावन झालेला, त्याग, पराक्रम आणि राष्ट्रनिष्ठेचे प्रतीक असणाऱ्या सातारा जिल्ह्याचे नाव बदलून ‘राजधानी सातारा’ करावा, अशी मागणी आज शिवसेनेचे जिल्हाप्रमुख रणजितसिंह भोसले यांनी पालकमंत्री शंभूराज देसाईंना निवेदनाद्वारे केली.

छत्रपती शिवाजी महाराजांनी उभारलेले हिंदवी स्वराज्य आणि छत्रपती संभाजी महाराजांनी दिलेल्या बलिदानातून जो इतिहास घडला, तो या भूमीत आजही जिवंत आहे. त्यामुळे साताऱ्याचे ‘राजधानी सातारा’ असे नामकरण होणे ही केवळ एक शाब्दिक प्रक्रिया नसून, आपल्या परंपरेला, शौर्याला व अस्मितेला दिलेला आदर आहे. त्यामुळे साताऱ्याचे नाव ‘राजधानी सातारा’ असे पाहिजे, अशी मागणी भोसले यांनी केली. या वेळी जिल्हाप्रमुख चंद्रकांत जाधव, प्रदीप माने, वासुदेव माने, संभाजी पाटील, योगेश फाळके, नीलेश मोरे, नवनाथ पाटील, राजू केंजळे व इतर उपस्थित होते.