दहिवडी (जि. सातारा) : माण तालुक्‍यातील बहुतांशी राज्य मार्ग, जिल्हा मार्ग, तसेच वाड्यावस्त्यांना जोडणाऱ्या रस्त्यांवरील बहुतांशी पूल पूर आल्यानंतर पाण्याखाली जातात. त्यामुळे तासन्‌तास वाहतुकीचा खोळंबा झाल्याने प्रवाशांची डोकेदुखी वाढत आहे. 

माणमध्ये जिल्ह्यातील इतर तालुक्‍यांच्या मानाने पावसाचे प्रमाण कमी असते. यावर्षीही पावसाचे प्रमाण चांगले आहे. त्यामुळे अनेकदा ओढे, नाले यासह माणगंगा नदीला पूर येत आहेत. पूर आल्यानंतर काही वेळातच कमी उंची असलेले पूल पाण्याखाली जातात. पुलावरून वाहणाऱ्या पाण्याचा वेग जास्त असल्यामुळे लगेचच वाहतूक ठप्प होते. पूर ओसरायची तासन्‌तास वाट पाहवी लागत असल्यामुळे प्रवाशांना त्रास सहन करावा लागतो. 

खेड्यातील मुलांना मोफत ऑनलाइनचे धडे; मुंबई महापालिकेचा महत्त्वपूर्ण निर्णय

दहिवडी-मलवडी-कुळकजाई, दहिवडी-राणंद-मार्डी, दहिवडी-पिंगळी बुद्रुक, दहिवडी-नरवणे-वडजल, म्हसवड परिसर, वरकुटे मलवडी परिसर या सर्वच मुख्य, तसेच ग्राम रस्त्यांवर कमी अधिक प्रमाणात छोटे-मोठे पूल आहेत. यातील अपवाद वगळता सर्वच पूल जुने व कमी उंचीचे आहेत. बहुतेक ठिकाणी सिमेंटच्या नळ्या वापरल्या आहेत. वाहून येणारा गाळ, वाळूमुळे, तसेच लाकडी ओंडक्‍यांमुळे या नळ्या मुजतात अथवा पाण्याच्या प्रवाहाला अडथळा होतो. त्यामुळे पाणी नळ्यांमधून जाण्याऐवजी पुलांवरून वाहते. मोठा पाऊस झाला, की थेट पुलांवरूनच पुराचे पाणी वाहण्यास सुरुवात होते. 

सातारा जिल्ह्यात 1160 नागरिकांचे नमुने तपासणीला; 1280 उपचारार्थ घरी परतले

शुक्रवारी झालेल्या मुसळधार पावसामुळे ओढे, नाले, तसेच नदीला आलेल्या पुरामुळे दहिवडी-कुळकजाई रस्त्यावरील तब्बल सहा ते सात पूल, मलवडी-परकंदी रस्त्यावरील दोन पूल, आंधळी गावात जाणारे दोन पूल, राणंद येथील, मार्डी-भालवडी रस्त्यावरील, पिंगळी बुद्रुक जवळील पूल असे अनेक पूल पाण्याखाली गेले होते. त्यामुळे वाहतूक मोठ्या प्रमाणात खोळंबली होती. पाण्याखाली जाणाऱ्या पुलांची उंची वाढवावी, अशी मागणी प्रवाशांकडून करण्यात येत आहे. 

संपादन : बाळकृष्ण मधाळे