नागठाणे (जि. सातारा) : एका पायाने आयुष्याच्या प्रवासाची वाटचाल करणाऱ्या अजयने बारावीच्या परीक्षेत प्रथम क्रमांक पटकावला आहे. रिक्षाचालक असलेल्या चुलत्यांच्या आधाराने गेली 12 वर्षे शिक्षणाचा पाया भक्कम करत त्याने हे नेत्रदीपक यश पटकावले आहे. 

ही कहाणी आहे एका दिव्यांग विद्यार्थ्याची. अजय कल्याण साळुंखे हे त्याचे नाव. तो सातारा तालुक्‍यातील देगाव येथील रहिवासी. गावातीलच धर्मवीर संभाजी विद्यालय अँड ज्युनियर कॉलेज ऑफ आर्टस महाविद्यालयात तो शिकतो. यंदा अजयने बारावीची परीक्षा दिली. नुकत्याच जाहीर झालेल्या परीक्षा निकालात अजयने प्रथम क्रमांक पटकावला आहे. अजयच्या या यशाला आगळी किनार आहे. तो बालपणापासून दिव्यांग आहे.

आजवरच्या त्याच्या आयुष्याचा हा प्रवास त्याने एकाच पायावर केला आहे. नियतीने आयुष्याला अपुरेपण देऊनही अजयने कधीही हार पत्करलेली नाही. अभ्यासात तो हुशार आहेच. मात्र, प्रबळ इच्छाशक्तीची जोडही त्याला यशाकडे घेऊन गेली आहे. त्याच्या या यशस्वी प्रवासात त्याचे चुलते धनाजी साळुंखे यांची भूमिकाही अत्यंत मोलाची ठरली आहे. ते स्वतः रिक्षाचालक, परिस्थिती बेताची. मात्र, गेल्या 12 वर्षांत ते अजयच्या पाठीशी सावलीसारखे उभे राहिले आहेत. 

उल्लेखनीय म्हणजे अजयला शाळेत ने-आण करण्याचे काम त्यांनी अत्यंत जबाबदारीने, तितक्‍याच आनंदाने पार पाडले आहे. आपल्या यशाचे श्रेय तो चुलत्यांसह आपले वडील, आई अश्विनी, वर्गशिक्षिका सौ. चव्हाण, प्राचार्य सतीश जाधव यांनाही देतो. अजयच्या या यशाबद्दल सर्व स्तरांतून त्याचे कौतुक होत आहे. 

प्रहार दिव्यांग संघटनेतर्फे गौरव 

अजयच्या या यशाबद्दल प्रहार संघटनेच्या वतीने त्याचा खास गौरव करण्यात आला. कार्यक्रमात चुलत्यांचाही आवर्जून सत्कार करण्यात आला. या वेळी देगावचे सरपंच गणेश रोकडे, प्रहार दिव्यांग संघटनेचे तालुकाध्यक्ष आनंदा यांच्यासह तानाजी साळुंखे, स्वप्नील साळुंखे, नारायण साळुंखे, संदीप साळुंखे, रमेश कुंभार, विजय निकम आदींची उपस्थिती होती. 

संपादन : पांडुरंग बर्गे