सातारा : दिल्‍ली येथील नॅशनल फेडरेशन केंद्रीय शिखर संस्थेकडून अजिंक्यतारा सहकारी साखर कारखान्यास सन २०२०-२०२१ चा 'हायस्ट शुगर रिकव्हरी इन हाय रिकव्हरी एरीया' हा इफिशियन्सी पुरस्कार जाहीर झाला आहे. नॅशनल फेडरेशनकडून यापूर्वी सन २०१९-२० च्या हंगामाकरीता अजिंक्यतारा कारखान्यास 'बेस्ट केन डेव्हलपमेंट इन हाय रिकव्हरी एरिया' पुरस्कार प्राप्त झाला होता. सलग दुसऱ्या वर्षी शिखर संस्थेचा पुरस्कार मिळाल्याने देशाच्या सहकार क्षेत्रात अजिंक्‍यताऱ्याचा नावलौकिक वाढीस लागला आहे.

यापुर्वी अजिंक्यतारा कारखान्यास तांत्रिक गुणवत्ता, कार्यक्षमता व अत्युत्तम उत्पादन क्षमतेच्या आधारे देश व राज्यस्तरावरून एकूण २८ पुरस्कार प्राप्त झालेले आहेत. सन २०२०-२१ व मागील सन २०१९-२०२० चा पुरस्कार वितरण सोहळा ता.१६ नोव्हेंबर रोजी नवी दिल्ली येथे होणार आहे. नॅशनल फेडरेशनकडून कारखान्यास सलग दुस-याही वर्षी पारितोषिक प्राप्त झाले, ही बाब सर्वांसाठी अभिमानास्पद असून कारखान्याच्या वैभवामध्ये भर पाडणारी आहे, असे गौरवोद्गार कारखान्याचे मार्गदर्शक संचालक आमदार शिवेंद्रसिंहराजे भोसले यांनी काढले.

काटकसरीचे धोरण अवलंबून कारखान्‍याचा कारभार सभासदाभिमूख करण्यात येत आहे. तालुक्याचे भाग्यविधाते स्व. भाऊसाहेब महाराज यांचे स्वप्न खऱ्या अर्थाने साकार झाले असून त्यांच्या आदर्श विचारसरणीला अनुसरून संचालक मंडळ नेहमीच सभासद हितासाठी कार्यरत राहील, असेही श्री. शिवेंद्रसिंहराजे यांनी यावेळी सांगितले. याबाबत कारखान्याचे चेअरमन सर्जेराव सावंत म्हणाले, शिवेंद्रसिंहराजे यांच्‍या रुपाने खंबीर व कुशूल नेतृत्व मिळाल्यामुळे कारखाना प्रगतीपथावर असून कारखान्‍याची दखल राज्‍य आणि देशापातळीवर त्‍यामुळेच घेतली जात आहे.