गोडोली (जि. सातारा) : सातारा शहराच्या दक्षिणेकडील पट्ट्यातील विस्तारित वसाहतीमधील दत्त कॉलनीमध्ये सासऱ्याच्या अंत्यविधीसाठी आलेला जावई कोरोनाबाधित झाल्याचे निष्पन्न झाल्यामुळे आरोग्य विभागाने संबंधित भाग प्रतिबंधित क्षेत्र जाहीर करून चारीही बाजूंनी या भागामध्ये कोणालाही येण्या-जाण्यास बंदी घातली आहे. तो जावई कुणाकुणाच्या संपर्कात आला, याचा शोध घेऊन संबंधितांचीही आरोग्य तपासणी केली जात आहे.
सातारा शहरातील साईमंदिर ते अजिंक्‍यतारा रस्त्यावरील अजिंक्‍य चौकाच्या दक्षिणेला थोड्याच अंतरावर दत्त कॉलनी आहे. ओढ्याच्या पलीकडच्या बाजूस असलेल्या दत्त कॉलनीत मागील आठवड्यात एक वृद्ध मयत झाल्यामुळे मोजकेच नातेवाईक अंत्यविधीसाठी आले. पण, त्यात एका जावयाला कोरोनाची बाधा झाल्याने सगळे कुटुंब हादरून गेले. परिणामी दत्त कॉलनी, जगतापनगर, आंबराई भाग जवळ असल्यामुळे आता रोज फिरायला येणाऱ्यांची संख्या कमी झाल्याचे दिसत आहे. त्यामुळे काहीजण अजिंक्‍यतारा पायथ्याला फिरताना दिसतात.
सध्या तरी दत्त कॉलनी चारीही बाजूंनी बंद केल्याने कुणालाही आत सोडत नाहीत व आतील व्यक्तींनाही बाहेर सोडत नाहीत. कळक बांधून रस्ते अडवले आहेत. अत्यावश्‍यक सेवा सुरू आहेत. दत्त कॉलनीच्या पूर्वेला शेजवळ घर ते संजीवनी क्‍लिनिक, पश्‍चिमेला कदम, साळुंखे घर, तर दक्षिणेला संजीवनी क्‍लिनिक ते श्री घर अशा चतुःसीमा निश्‍चित करून आरोग्य विभाग पुढील कार्यवाही करीत आहे.
कोरोनाच्या छायेखाली...
आत्तापर्यंत या भागात एकही रुग्ण आढळलेला नव्हता. त्यामुळे लोक बिनधास्तपणे मोठ्या संख्येने फिरत होते. पण, जावई बाधित झाल्याने या परिसरात सगळीकडे चर्चा पसरली व अवघी दत्त कॉलनी व जगतापनगर कोरोनाच्या छायेखाली असल्याचे चित्र पाहायला मिळत आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.