Koregaon: सातारारोड (ता. कोरेगाव) गावच्या हद्दीत मोटारसायकलवरून जाताना एका खड्ड्यातील पाणी अंगावर उडाल्याच्या कारणावरून एकास लोखंडी गजाने मारहाण करून गंभीर जखमी केल्याप्रकरणी चौघांवर कोरेगाव पोलिसात गुन्हा दाखल झाला आहे. याबाबत निरंजन रणजित फाळके (वय २२, रा. फाळके चाळ, सातारारोड, ता. कोरेगाव) यांनी फिर्याद दिली आहे.

फिर्यादीत म्हटले की, काल रात्री पावणेनऊच्या सुमारास मी व माझा गावातील मित्र मंथन रत्नाकर सुतार असे दोघे मोटारसायकलवरून निघालो होतो. वालचंदनगर गेटसमोरील रोडने मोतीचंदनगर कॉलनीत जाताना माझी गाडी खड्ड्यातून गेल्याने खड्ड्यातील पाणी रस्त्याच्या कडेने जाणाऱ्या दोघांच्या अंगावर उडाले. अंगावर पाणी उडाल्याने त्या दोघांपैकी सिकंदर शेख यांचा एक कामगार मला शिव्या देऊन पळून गेला. मी त्याच्यामागे पळत जाऊन सिकंदर शेख यांच्या घरासमोर जाऊन त्या कामगाराशी बोलत होतो. त्या वेळी सिकंदर शब्बीर शेख, सोहेल बशीर शेख व अकीब बशीर शेख (सर्व रा. सातारारोड) हे घराबाहेर आले.

त्यातील सोहेलने तेथे पडलेला लोखंडी गजाने माझ्या डोक्यात मारून मला गंभीर जखमी केले, सिकंदर व अकीब यांनी मला हाताने लाथाबुक्क्यांनी मारहाण केली. माझा मित्र मंथन सुतार हा मला सोडवण्यास आला असता त्यालासुद्धा सोहेलने शिवीगाळ करून जिवे मारण्याची धमकी दिली. म्हणून माझी सिकंदर शेख, सोहेल शेख, अकीब शेख व सिकंदर शेखचा एका कामगाराविरोधात तक्रार आहे. हवालदार साळुंखे तपास करत आहेत.