कऱ्हाड (जि. सातारा) : शेअर मार्केटमधून कमी दिवसांत जादा टक्केवारीने पैसे परत देण्याचे आमिष दाखवून शहरातील युवकांना सुमारे 20 लाखांना गंडा घालणाऱ्या परप्रांतीय युवकास पोलिसांनी गजाआड केले. उत्तर प्रदेश येथील ग्रेटर नोयडा येथे सापळा रचून शहर पोलिसांच्या पथकाने त्यास पकडले आहे. हरिदयाळ रंजनदास गुप्ता (रा. सॉक्रेटिस थ्री, ओमिक्रॉन, ग्रेटर नोएडा, उत्तर प्रदेश) असे अटक झालेल्याचे नाव आहे. त्याच्याकडून तीन मोबाईल संचासह लॅपटॉप जप्त केला आहे. 

पोलिसांनी दिलेली माहिती अशी, शहरातील युवकांना शेअर मार्केटमधून कमी दिवसांत जादा टक्केवारीने पैसे परत देण्याचे आमिष दाखवून गुप्ता याने शहरातील युवकांकडून 19 लाख 87 हजार 500 रुपये रक्कम वेगवेगळ्या बॅंक खात्यावर मागवून घेतली. ती रक्कम परत न देता तो पसार झाला होता. त्याबाबत शहर पोलिसात फिर्याद दाखल होती. फसवणुकीचे गुन्हे उघड करण्यासाठी खास पथकाची नेमणूक केली होती. 

घनकचरा प्रकल्पाबाबत त्वरित चौकशी करा; जयंवत पाटलांची जिल्हाधिकाऱ्यांकडे मागणी

त्यानुसार पोलिस निरीक्षक बी. आर. पाटील यांच्या नेतृत्वाखाली सहायक पोलिस निरीक्षक अमित बाबर, हवालदार तानाजी शिंदे, प्रफुल्ल गाडे, मारुती लाटणे, विनोद माने आदींनी या गुन्ह्याचा तपास केला. काही तांत्रिक व महत्त्वाच्या माहितीच्या आधारावर गुन्हे उघडकीस आणण्यासाठी त्यांनी माहिती जमा केली. त्यानुसार गुप्ताची माहिती हाती आली. त्याची खात्री झाल्याने त्यांनी दिल्ली व नोएडा भागात जाऊन तपास केला. त्यात त्याला अटक झाली. त्याच्याकडून तीन मोबाईल व एक लॅपटॉप जप्त करण्यात आला आहे. त्याला न्यायालयात हजर केले असता दोन दिवसांची पोलिस कोठडी सुनावली आहे.

सातारा जिल्ह्यात 756 गावांत महिला राज; 659 गावे खुल्या प्रवर्गासाठी ​ 

संपादन : बाळकृष्ण मधाळे