उंब्रज : शेतकऱ्यांच्या प्रश्नाला न्याय देण्यासाठी, शेतकऱ्यांच्या हितासाठी जिल्हा मध्यवर्ती बॅंकेच्या निवडणुकीला सामोरे जात आहे. मतदारांनी बॅंकेच्या निवडणुकीला सांघिकपणे सामोरे जावे, असे आवाहन सहकार व पणनमंत्री तथा जिल्ह्याचे पालकमंत्री बाळासाहेब पाटील यांनी केले.

सातारा जिल्हा बँक निवडणुकीच्या पार्श्वभूमीवर पालीच्या खंडोबाचे दर्शन घेतल्यानंतर येथे आयोजित मेळाव्यात ते बोलत होते. माजी सभापती देवराज पाटील, जिल्हा परिषदेचे शिक्षण सभापती मानसिंगराव जगदाळे, चंद्रकांत जाधव, सभापती प्रणव ताटे, राजाभाऊ पाटील-उंडाळकर, राजेश पाटील-वाठारकर, अशोकराव पाटील-पार्लेकर, संगीता साळुंखे आदी उपस्थित होते.

मंत्री पाटील म्हणाले, ‘‘अर्ज भरण्याच्या आजच्या शेवटच्या दिवशी जिल्हा बॅंक निवडणुकीचा अर्ज दाखल केला. प्रथेप्रमाणे तीर्थक्षेत्र पाल येथे खंडोबाचे दर्शन घेतले. सातारा जिल्हा बँक ही ज्‍येष्ठ नेते यशवंतराव चव्हाण यांच्या विचारातून निर्माण झाली. किसन वीर यांच्यासह अनेकांचे योगदान राहिले आहे. आपल्या पाठीशी मतदार असल्याने मतदारसंघातून उभे राहण्याचा निर्णय घेतला. जिल्हा बँक निवडणुकीचे चित्र दहा तारखेला स्पष्ट होईल. दरम्यानच्या काळात काही लोक येतील, पॅनेलची भूमिका मांडतील. मात्र, काही लोक संभ्रम निर्माण करायचा प्रयत्न करतील."

"तालुक्यातील सर्व मतदार व सोसायटी मतदारांशी चर्चा झाली आहे. २० ते २५ वर्षे जबाबदारीने सहकारात काम केले आहे. सातारा जिल्ह्याच्या पालकमंत्रिपदाची जबाबदारी माझ्यावर आहे. कुणाचीही आजपर्यंत अडवणूक केली नाही, त्रास दिलेला नाही. भविष्यात हीच भूमिका राहील. जिल्हा बॅंक निवडणुकीत निर्माण झालेल्या शरद पवार यांच्या विचाराच्या पॅनेलच्या माध्यमातून निवडणुकीला सामोरे जात आहे. मतदारांनी आपसातील मतभेद बाजूला ठेवून सांघिकपणे निवडणुकीला सामोरे जावे. टीका-टिप्पणी झाल्यास जशास तसे उत्तर देऊ.’’ माणिकराव पाटील यांनी आभार मानले.