सातारा : शाळा सुरू झाल्यानंतर खासगी शाळांनी महिनाभरात शाळा समितीने पालक संघाची बैठक घेऊन प्रवेश शुल्क निश्‍चिती करावी. शाळांनी शुल्क निश्‍चित केल्यानंतर शाळेच्या प्रवेशद्वारावर माहितीपत्रक लावण्यात यावे. याबाबत येत्या महिन्यात कार्यवाही न झाल्यास व जादा शुल्क आकारल्याची तक्रार आल्यास संबंधित शाळेवर कारवाई करण्याचा इशारा शिक्षणाधिकारी प्रभावती कोळेकर यांनी शाळेच्या पहिल्याच दिवशी खासगी शाळांना दिला आहे.

दरवर्षी शहरातील खासगी माध्यमाच्या शाळा प्रवेश शुल्क निश्‍चित करूनही जादा शुल्क आकारण्याच्या निदर्शनास येते. यामध्ये प्रामुख्याने इंग्रजी माध्यमातील शाळांचा समावेश असतो. या प्रकारामुळे दरवर्षी पालकांना आर्थिक भुर्दंड सहन करावा लागतो. त्यामुळे यंदा शाळा सुरू झाल्यानंतर तत्काळ शिक्षण विभागाने पत्र काढून तीस दिवसांच्या आत शाळा व्यवस्थापनाने पालक संघाची बैठक घेऊन शुल्क निश्‍चिती करण्याचे आदेश दिले आहेत.पान ६ वर

...तर दहापट दंड वसुली

खासगी अनुदानित, अंशत: अनुदानित शाळांकरिता ६ ते १४ वयोगटातील विद्यार्थ्यांना प्राथमिक शिक्षण मोफत देणे बंधनकारक आहे. या शाळांनी विद्यार्थ्यांच्या प्रवेशासाठी शुल्क अथवा देणगी आकारल्यास शुल्क रकमेच्या दहापट दंड संबंधित शाळेला आकारत कारवाई करणार असल्याचा इशारा शिक्षण विभागाने दिला आहे. याबाबत शाळांनी नियमानुसार काम करावे, असेही त्यांनी सांगितले आहे.

शाळा सुरू झाल्याने शाळा व्यवस्थापन समितीने पालक संघांची एक महिन्याच्या आत बैठक घेऊन शुल्क निश्‍चिती करावी. शाळांनी नियमबाह्य शुल्क आकारल्यास कारवाई केली जाणार आहे.

-प्रभावती कोळेकर, शिक्षणाधिकारी, माध्यमिक विभाग