फलटण शहर (जि. सातारा) : फलटणचे अभियांत्रिकी महाविद्यालय कोरोनाच्या पार्श्‍वभूमीवर येणारी व 
आगामी काळातील बदलांची नवीन आव्हाने पेलण्यास सज्ज असून, विद्यार्थ्यांना कशा प्रकारे शिक्षण देता येईल, याचे नियोजनही महाविद्यालयाने केले आहे, अशी माहिती फलटण एज्युकेशन सोसायटीचे सचिव व महाराष्ट्र राज्य खो-खो असोसिएशनचे अध्यक्ष संजीवराजे नाईक-निंबाळकर यांनी दिली. 

फलटण एज्युकेशन सोसायटीच्या अभियांत्रिकी महाविद्यालयाबाबत माहिती देण्यासाठी आयोजित पत्रकार परिषदेमध्ये ते बोलत होते. यावेळी भोजराज नाईक-निंबाळकर, हेमंत रानडे, डॉ. पार्श्वनाथ राजवैद्य, प्रशासकीय अधिकारी अरविंद निकम, अधीक्षक श्रीकांत फडतरे, महाविद्यालयाचे नूतन प्राचार्य डॉ. अजय देशमुख यांची प्रमुख उपस्थिती होती. अभियांत्रिकी महाविद्यालय सुरू केल्यानंतर कमिन्स कंपनीचे महाविद्यालयासाठी चांगले सहकार्य लाभले. विधान परिषदेचे सभापती रामराजे नाईक- निंबाळकर, कृषी उत्पन्न बाजार समितीचे सभापती रघुनाथराजे नाईक-निंबाळकर यांच्या मार्गदर्शनाखाली आपण अभियांत्रिकी महाविद्यालय सुरू केले व त्याची यशस्वी वाटचाल आपण सुरू ठेवली आहे. आता कोरोनाच्या काळात आपल्याला शिक्षण पध्दतीत काय बदल करून कोणत्या प्रकारे आपल्याला शिक्षण देता येतील, त्याबद्दल आपण आता कार्यरत राहणार असून, अभियांत्रिकी महाविद्यालयात नवीन प्राचार्य आपण नेमले आहेत.

नूतन प्राचार्य डॉ. अजय देशमुख यांना अभियांत्रिकी महाविद्यालयात कार्य करण्याचा प्रदीर्घ असा अनुभव आहे. उद्योगक्षेत्र व शैक्षणिक क्षेत्र त्यातल्या त्यात अभियांत्रिकीच्या शिक्षणात योग्य ते बदल करण्यासाठी प्रयत्नशील आहेत. हे नेमके कुठले बदल अभियांत्रिकी शिक्षणासाठी पूरक आहेत, याबद्दल आता उत्सुकता दिसून येत आहे. या निमित्ताने शैक्षणिक उपक्रमाचा आढावा घेऊन वेगळे प्रयत्न होणे अत्यावश्‍यक असल्याचे संजीवराजे यांनी सांगितले. 

प्राचार्य डॉ. अजय देशमुख यांनी अभियांत्रिकी महाविद्यालयात भविष्यात राबविण्यात येणाऱ्या शैक्षणिक उपक्रमांची माहिती दिली. उद्योग क्षेत्रासाठी (MoU) कंपन्यांकडून इच्छुक विद्यार्थ्यांना प्रशिक्षण, स्पर्धा परीक्षा मार्गदर्शन व अभ्यासाच्या सोयी इंटर्नशिप व प्लेसमेंट विद्यार्थ्यांच्या एक्‍सलन्ससाठी शिक्षकांकडून प्रामाणिक व योग्य ते प्रयत्न केले जातील. महाराष्ट्रातील अव्वल दर्जाचे शिक्षण महाविद्यालयात उपलब्ध होण्यासाठी प्रयत्न होणार असून, संजीवराजे नाईक-निंबाळकर यांच्या सर्वतोपरी मार्गदर्शनाखाली व मदतीमुळेच हे सर्व शक्‍य होईल.'' भोजराज नाईक-निंबाळकर यांनी आभार मानले.