कोरेगाव : तालुका वंचित बहुजन आघाडीतर्फे आज येथील तहसीलदार कार्यालयासमोर ओबीसी जातनिहाय जनगणना करावी, वाढती महागाई रोखावी, सच्चर समितीच्या शिफारशी लागू कराव्यात आदी मागण्यांसाठी आघाडीचे पश्चिम महाराष्ट्र उपाध्यक्ष चंद्रकांत खंडाईत यांच्या नेतृत्वाखाली भर उन्हात धरणे आंदोलन करण्यात आले.

राज्य शासनाने ओबीसी प्रवर्गाची तातडीने जातनिहाय जनगणना करण्यासंदर्भात केंद्र सरकारला ठराव द्यावा, वाढत्या महागाईमुळे सामान्यांचे जीवनमान कोलमडल्यामुळे महागाई कमी करण्यासाठी तातडीने उचित पावले उचलावीत, सच्चर समिती शिफारशींची अंमलबजावणी करावी, अनुसूचित जाती जमातीच्या लोकांचे पदोन्नतीमधील अडकलेले आरक्षण तातडीने सुरू करावे, भटके विमुक्तांच्या सवलती तातडीने सुरू कराव्यात आदी मागण्यांचे निवेदन या वेळी तहसीलदारांना देऊन पूर्ततेसाठी आंदोलनाचा इशाराही देण्यात आला.

धरणे आंदोलनस्थळी श्री. खंडाईत, सुहास पुजारी, सुनील कदम, सुभाषराव गायकवाड, सुरेश गायकवाड, संजय कर्पे, दादासाहेब केंगार, बाळकृष्ण देसाई, सचिन भंडलकर, नितीन भोसले यांनी मार्गदर्शन केले. आंदोलनासाठी आघाडीचे तालुका महासचिव विजयराव मोरे, बाबा आवाड, लक्ष्मण वाघमारे, निसार खान, शंकर खंडाईत यांनी परीश्रम घेतले. या वेळी निवृत्ती सोनवणे, सुधाकर जगताप, अधिक जगताप, जगन्नाथ वाघमारे, सुनील बडेकर, नाना बडेकर, लक्ष्मण आवडे, रफिक मुलाणी, चंद्रकांत कांबळे, सचिन जाधव, प्रल्हाद कदम, मारुती चव्हाण आदी उपस्थित होते.