ढेबेवाडी (जि. सातारा) : बैलगाडी शर्यतीबाबत तत्काळ सुनावणी घेण्यासाठी राज्य शासन पुढील आठवड्यात सर्वोच्च न्यायालयात विनंती अर्ज करणार आहे. मंत्रालयात झालेल्या बैठकीत त्याबाबतचा निर्णय घेण्यात आला आहे. याप्रश्नी लढा देत असलेले अण्णासाहेब पाटील महामंडळाचे अध्यक्ष नरेंद्र पाटील यांनी ही माहिती दिली. 

अखिल भारतीय बैलगाडी शर्यत संघटनेच्या माध्यमातून बैलगाडी शर्यती सुरू होण्यासाठी अनेक वर्षांपासून सामाजिक, राजकीय व प्रशासकीय पातळीवर पाठपुरावा सुरू आहे. शासनाने कायदा केलेला असूनही सद्य:स्थितीत बैलगाडी शर्यतीचा विषय सर्वोच्च न्यायालयात प्रलंबित आहे. काही दिवसांपासून त्याबाबत सर्वोच्च न्यायालयात सुनावणी झालेली नाही, असे नमूद करून श्री. पाटील म्हणाले, ""गेल्याच आठवड्यात आपण स्वतः पशुसंवर्धन मंत्री सुनील केदार यांची भेट घेऊन या विषयावर तत्काळ बैठकीचे आयोजन करावे, अशी विनंती केली होती. त्यानुसार मंत्रालयात बैठक झाली. मंत्री सुनील केदार, खासदार डॉ. अमोल कोल्हे, डॉ. संतोष पंचपोर, डॉ. परकाळे, डॉ. प्रशांत भड, नितीन शेवाळे, धनाजी शिंदे, संदीप बोदगे, रामकृष्ण टाकळकर, बाळासाहेब आरुडे आदींसह आपण उपस्थित होतो. बैलगाडी शर्यतीचा विषय अनेक दिवस प्रलंबित असल्याने शेतकरी वर्गात नाराजी आहे. याबाबत राज्य शासनाने सर्वोच्च न्यायालयात विनंती अर्ज करून तत्काळ सुनावणी घेतली जावी, अशी मागणी संघटनेकडून बैठकीत करण्यात आली. त्यानंतर दिल्लीतील वकिलांशी मंत्र्यांनी चर्चा करून तत्काळ कार्यवाही करण्यास सांगितले. राज्याचे महाधिवक्ता आशुतोष कुंभकोणी यांनाही पशुसंवर्धन विभागाच्या अधिकाऱ्यांसोबत बैलगाडी शर्यतीच्या विषयावर बैठक घेण्याबाबत सांगण्यात आले. 

(संपादन ः संजय साळुंखे) 

मिलिटरी अपशिंगे, पुस्तकांचं भिलार माहितीच असेल, मग जाणून घ्या टॅक्सीचं गाव